ڈیرہ اللہ یار(این این آئی)ناظم صحت جعفرآباد ڈاکٹر قدرت اللہ جمالی نے کہا ہے کہ جعفرآباد سے کورونا وائرس کے متاثرہ 31مریضوں میں 27مریض صحتیاب ہو گئے ہیں جنہیں گھر روانہ کردیا گیا مزید مریضوں کا بھی علاج معالجہ جاری ہے جو کہ جلد ہی صحتیاب ہو جائیں گے

انہوں نے کہا کہ ڈیرہ اللہ یار اور روجھان جمالی سے مجموعی طور پر 168افراد کے کورونا وائرس کے نمونے حاصل کرکے لیبارٹری بھجوائے گئے تھے جن میں 31افراد کے کورونا وائرس ٹیسٹ مثبت آئے تھے جنہیں کوئٹہ شیخ زید اسپتال میں قرنطینہ کرکے انکا علاج معالجہ شروع کردیا گیا جبکہ 7مریضوں کو علاج کے لیے کراچی کے نجی اسپتال منتقل کیا گیا تھا ڈاکٹر قدرت اللہ جمالی نے بتایا ہے کہ ڈیرہ اللہ یار سے کورونا وائرس کے مریضوں میں صحتیاب ہونے والوں میں 17خواتین جبکہ12مرد شامل ہیں انکا کہنا تھا کہ کورونا وائرس سے بچاؤ کو واحد حل سماجی دوری اور اپنے آپ کو صاف شفاف رکھنا ہے احتیاطی تدابیر سے ہی اس عالمی وبا سے محفوظ رہا جاسکتا ہے شہری لاک ڈاؤن کی نرمی سے بیجا فائدہ اٹھا رہے ہیں اور عید خریداری میں ایس او پیز پر عملدرآمدنہیں کیا جارہا ہے جس کے باعث کورونا وائرس پھیلنے کا اندیشہ ہے انہوں نے کہا کہ عوام عید خریداری میں ایس پی ایز پر عمل کریں تاکہ کورونا وائرس سے بچا جاسکے۔