اسلام آباد (این این آئی)وفاقی وزیر برائے منصوبہ بندی اسد عمر نے اپنی ہی جماعت کے کراچی کے صدر خرم شیر زمان کے سندھ میں کورونا کیسز کی تعداد کو بڑھا چڑھا کر پیش کرنے کے بیان کو غیر ذمہ دارانہ قرار دیدیا۔ایک انٹرویومیں اسد عمر نے کہا کہ وبا سے بچنے کے لیے اقدامات کی بھاری قیمت اداکر رہے ہیں جبکہ حفاظتی سامان ہسپتال کے میڈیکل سپرنٹنڈنٹ (ایم ایس) کو براہ راست دیاجا رہاہے۔انہوں نے بتایا کہ ہسپتال آمد پر انتقال کرنے والے کا بھی کورونا ٹیسٹ کیا جاتا ہے۔
اسدعمر کا کہنا تھا کہ ہمارے فیصلوں کا زیادہ تر انحصار رپورٹ ہونے والی اموات پر ہوتا ہے۔ انہوں نے کہاکہ سندھ میں اعداد وشمار بڑھا چڑھا کرپیش کرنے کی خرم شیرزمان کی بات غیرذمہ دارانہ ہے۔خیال رہے کہ پاکستان تحریک انصاف (پی ٹی آئی) کے رہنما خرم شیر زمان نے سندھ حکومت پر کورونا کے غلط اعداد و شمار بتانے کا الزام لگاتے ہوئے کہا تھا کہ پیپلزپارٹی صوبے میں کورونا وائرس کے اعداد وشمار بڑھا چڑھا کر بیان کر رہی ہے۔
