لاہور( آن لائن )حکومت کی اتحادی جماعت مسلم لیگ (ق) نے قومی احتساب بیورو(نیب) کے خلاف لا ہو ر ہا ئیکو رٹ میں درخواست دائر کر دی۔ درخواست میں موقف اپنایا کہ نیب سیاسی انجینئرنگ کرنیوالے ادارہ ہے،چیئرمین نیب کے 19 سال پرانے کیس کھولنے کے اقدام کو غیر قانونی قرار دیا جائے ۔تفصیلا ت کے مطابق چوہدری شجاعت اور چوہد ری پرویز الہی نے لاہور ہائیکورٹ میں نیب کیخلاف
دائر درخواست میں مؤقف اپنایا ہے کہ نیب کے کردار اور تحقیقات کے غلط انداز پر عدالتیں فیصلے بھی دے چکی ہیں۔انہوں نے مؤقف اپنایا کہ چیئرمین نیب نے ہمارے خلاف 19 سال پرانے معاملے کی دوبارہ تحقیقات کا حکم دیا ہے اور اس سے قبل بھی نیب نے 19 سال قبل آمدن سے زائد اثاثہ جات کی مکمل تحقیقات کیں مگر ناکام ہوا۔ چیئرمین نیب کو 19 سال پرانے اور بند کی جانیوالی انکوائری دوبارہ کھولنے کا اختیار نہیں، ہمارا سیاسی خاندان ہے اور ہمیں سیاسی طور پر انتقام کا نشانہ بنایا جاتا رہا ہے۔چوہدری برادران کی جانب سے استدعا کی گئی ہے کہ نیب کا 19 برس پرانے آمدن سے زائد اثاثہ جات کی انکوائری دوبارہ کھولنے کا اقدام غیرقانونی قرار دیا جائے۔
