اسلام آباد(مانیٹرنگ ڈیسک)معروف عالم دین مولانامحمد ناصر مدنی اور پیر آف بلاوڑہ شریف حق خطیب حسین علی بادشاہ کے درمیان صلح ،مولانا ناصر مدنی ، حق خطیب حسین کو اپنا بھائی قرار دیتے ہوئے ماضی میں ان پر لگائے جانے والے الزامات سے بھی دستبردار ہو گئے۔تفصیلات کے مطابق پیر آف بلاوڑہ شریف حق خطیب حسین علی بادشاہ اور معروف خطیب مولانا محمد ناصر مدنی کے درمیان صلح ہو گئی ہے۔
حق خطیب حسین علی بادشاہ مولانا ناصر مدنی سے صلح کے لئے رات گئے ان کے گھر پہنچے جہاں مولانا ناصر مدنی اور حق خطیب کے درمیان معاملات طے پا گئے ہیں ،ذمہ دار ذرائع کا کہنا ہے کہ دونوں مذہبی شخصیات کے درمیان صلح کا معاملہ گزشتہ کئی دنوں سے چل رہا تھا اور چند اہم شخصیات اس معاملے کو حل کرنے کے لئے معاملات کو حتمی شکل دینے میں مصروف تھیں۔مولانا ناصر مدنی حق خطیب حسین علی بادشاہ سے ہونے والی ’’صلح‘‘ بارے آج کسی بھی وقت پریس کانفرنس کرینگے،ذمہ دار ذرائع کا کہنا ہے کہ ناصر مدنی کے ملزمان جن میں تین بھائی برطانوی شہری اور حق خطیب حسین کے خاص مریدوں میں شامل ہیں جلد ہی جیل سے ضمانت پر رہا ہو جائیں گے ۔یاد رہے کہ کچھ عرصہ قبل کھاریاں کے علاقے میں چار ملزمان نے اپنے ڈیرے پر لے جا کر مولانا ناصر مدنی کو برہنہ کرکے بدترین تشدد کا نشانہ بنایا تھا ،پولیس نے 24 گھنٹے کے اندر مولانا ناصر مدنی پر تشدد کرنے والے چاروں ملزمان کو گرفتار کر لیا تھا ،گرفتار ملزموں میں غلام ربانی، علی عباس، ناظم حسین اور آصف اقبال شامل تھے جبکہ پانچویں ملزم رضوان خان مفرور ہو گیا تھا تاہم بعد ازاں رضوان خان نے ضمانت قبل از گرفتاری کروانے کے بعد منظر عام پر آتے ہوئے مولانا ناصر مدنی پر انتہائی شرمناک الزامات بھی عائد کئے تھے جن کی مولانا ناصرمدنی نے تردید کی تھی اور حق خطیب حسین کی طرف اشارہ کرتے ہوئے ان کی گرفتاری کا مطالبہ بھی کیا تھا ۔
