اسلام آباد(نیوز ڈیسک)مسجد حرام کی توسیع کے ساتھ مسجد کے کونے کونے میں صاف اور مکمل آواز پہنچانا ہمیشہ ہی ایک چیلنج رہا ہے مگرسعودی عرب کی حکومت نے اس چیلنج سے بھی کامیابی سے نمٹ لیا ہے۔سعودی میڈیا کے مطابق حال ہی میں مسجد حرام کے ساﺅنڈ سسٹم کی ایک ویڈیو سامنے آئی ہے جس میں “ایم سی آر” طرز کے سسٹم کے ذریعے حرم شریف میں آذان، نمازوں بالخصوص نماز تراویح کی آواز کو حرم کے اندر اور قرب وجوار تک نہایت صفائی کے ساتھ پہنچانے کا اہتمام کیاگیا ہے۔مسجد حرام کے ڈائریکٹر آپریشنز انجینیر فارس الصاعدی کا کہنا ہے کہ گذشتہ چند برسوں کے دوران تراویح میں نمازیوں کی تعداد میں مسلسل اضافہ ہوتا رہا ہے اور اب یہ تعداد15 لاکھ نمازیوں تک جا پہنچی ہے۔ مسجد حرام میں نماز تراویح کی ادائیگی میں لوگوں کی دلچسپی کی دیگر وجوہات میں ایک یہاں کا ساﺅنڈ سسٹم بھی ہے۔ تمام مقتدی امام کی قرائت کومکمل صفائی کے ساتھ سن سکتے ہیں۔