اسلام آباد(مانیٹرنگ ڈیسک) سربراہ نیشنل انسٹیٹیوٹ برائے امراض خون ڈاکٹر طاہر شمسی نے دعویٰ کیا ہے کہ جو شخص کورونا وائرس سے صحت یاب ہو گا، اس کی مدد سے باقی مریضوں کا علاج کیا جا سکتا ہے۔

نجی ٹی وی سے گفتگو کرتے ہوئےان کا کہنا تھا کہ صحت مند ہونےو الے شخص کے خون کے پلازما کو اگر کسی مریض کو دیا جائے تو اس کے جسم میں اس کے مثبت اثرات پیدا ہوں گے جس کے بعد اس کی قوت مدافعت بہتر ہو گی اور وہ جلد صحت یاب ہو جائے گا۔ان کا مزید کہنا تھا کہ پاکستان میں ایسا ممکن ہے اور اس کی ٹیکنالوجی بھی موجود ہے، اس لئے ہمارے لئے اس کا علاج کرنا مشکل نہیں ہے۔ یاد رہے کہ پوری دنیا میں 3 لاکھ 80 ہزار سے زیادہ افراد کو متاثر کرنےاور 16 ہزار سے زیادہ افراد کی ہلاکت کا سبب بننے والے کورونا وائرس نے اب پاکستان میں اپنی تباہی کا سلسلہ شروع کر دیا ہے جس کے بعد ابھی تک اس سے متاثرہ افرا د کی تعداد 877 ہو گئی ہے جبکہ 6 افراد اس کی وجہ سے ہلاک ہو چکے ہیں۔ دنیا بھر کے ماہرین کی جانب سے کوشش کی جا رہی ہے کہ کورونا وائرس کا علاج یا اس کی ویکسین تیار کر لی جائے لیکن اس میں ابھی تک کسی قسم کی کوئی کامیابی سامنے نہیں آئی۔