کراچی(این این آئی) امیر اہلسنت حضرت علامہ محمدالیاس عطارقادری نے کہا ہے کہ جو زندگی ہے اس کی موت کا وقت مقرر ہے،ایسے حالات میں جن کی نماز یں قضا ہوگئی ہیں انہیں چاہئے کہ وہ نمازوں کو ادا کریں،اللہ کا ذکر کریں اور وقت کو ضائع نہ کریں،اور نہ گھبرائیں،ایسا لگتا ہے اس کورونا وائرس سے لوگ بد حواس ہوگئے ہیں،
افواہیں پھیلانے والے توبہ کریں کہ کہیں ایسا نہ ہو اس آفت میں مبتلا ہوجائیں۔امیر اہلسنت دامت نے کہا کہ دنیا کا مال کسی کے کام آیا ہے اور نہ آئے گا،یاد رکھیں نیکیاں بلاؤں کو دور کرتی ہے، ہوسکتا ہے کسی پر کورونا وائرس حملہ آور ہونے والا ہواور اس کی نیکی کی وجہ سے وہ اپنا رخ بدل دے،لہٰذا ہمیں سب کے ساتھ اچھا سلوک کرنا چاہئے۔ امیر اہلسنت نے کہا کہ دین بھلائی کا مذہب ہے،مومن کامل وہ ہے جو اپنے لئے پسند کرے وہ اپنے مسلمان بھائی کیلئے بھی پسند کرے، کوئی بھی شخص مہنگا سامان خریدنا پسند نہیں کرتابلکہ وہ چاہتا ہے کہ سستا اور معیاری سامان اسے ملے،لہٰذا اپنے لئے جو پسند کرتے ہیں وہ اپنے مسلمان بھائی کیلئے پسند کریں،یہ دولت کس کے کام آئی ہے،قارون کا خزانہ بہت بڑا تھا اس کے خزانے کی چابیاں چالیس آدمی اٹھاتے تھے مگروہ خزانہ اس کے کام نہ آیا،وہ زمین میں اپنے خزانے سمیت دھنسادیا گیا۔امیر اہلسنت کہا کہ اگر تمام صاحب حیثیت افراد اپنی زکوۃ درست طور پرادا کریں توہمارے ملک سے غربت کا خاتمہ ہوجائے گا،ایسے بھی لوگ ہیں جو اپنی زکوۃ ادا کرتے ہیں اور نفلی صدقات بھی دیتے ہیں اور خوش ہیں،مال مال نہ کریں بلکہ مولا کو یاد کریں مال بھی مل جائے گا اور مولا بھی مل جائے گا اور اگر مال کی طلب ہوگی تو نہ مال ملے گا نہ مولا ملے گا۔
