اسلام آباد (نیوز ڈیسک) ماروی سرمد اور خلیل الرحمان قمر کے درمیان ٹی وی پروگرام میں براہ راست گالم گلوچ کے بعد ماروی سرمد کے فون نمبر اور ای میل ایڈریس لیک کر دیے گئے۔ اس بات کا انکشاف ماروی سرمد نے اپنے ٹوئٹر بیان میں کیا انہوں نے کہا کہ مجھے میرے موبائل فون اور ای میل ایڈریس پر عصمت دری اور قتل کی دھمکیاں مل رہی ہیں جبکہ کچھ لوگوں کی جانب سے مجھے خود کو جنسی طور پر فروخت کرنے کا بھی کہا جا رہا ہے۔ انہوں نے اپنے پیغام میں کہا کہ مجھے گالم گلوچ اور دھمکی آمیز پیغامات 10 ہزار فی گھنٹے

کے حساب سے موصول ہو رہے ہیں۔ انہوں نے اپنے ٹوئٹر بیان میں مزید کہا کہ کسی گھٹیا شخص کی جانب سے میرا فون نمبر اور ای میل ایڈریس سوشل میڈیا پر لیک کر دیا گیا ہے جس کے بعد مجھے عصمت دری، قتل کی دھمکیاں اور جنسی ہراسانی جیسے میسجز موصول ہونے کا سلسلہ جاری ہے۔ واضح رہے کہ میرا جسم میری مرضی پر دونوں کے درمیان تنازع کھڑا ہوا تھا جس کے بعد لوگوں نے ماروی سرمد کو شدید تنقید کا نشانہ بنایا اور کچھ افراد ان کے حق میں کھڑے ہو گئے، یہ معاملہ ابھی تک چل رہا ہے۔