کراچی(نیوزڈیسک)مہنگائی کی شرح میں اضافے کا تسلسل جاری ہے، رواں مالی سال 2014-15 کے آخری ماہ (جون 2015)کے تیسرے ہفتے کے دوران مہنگائی کی شرح میں 0.25 فیصد اضافہ ریکارڈ کیا گیا جبکہ کم آمدنی والے طبقے کے لئے قیمتوں کے حساس اعشاریہ میں 0.26 فیصد اضافہ دیکھنے میں آیا۔وفاقی ادارہ شماریات کے اعداد و شمار کے مطابق 20 جون کو ختم ہونے والے ہفتے کے دوران انڈے، آلو،چینی ، گڑ، لہسن ،مسور کی دال ،چنے کی دال ، مٹن،بیف ، تازہ دودھ، دہی ، سرخ مرچ ، نمک ،آٹااور کیلے سمیت 18 اشیائے ضروریہ کی قیمتوں میں اضافہ ریکارڈ کیاگیا ۔اعداوشمار کے مطابق زندہ مرغی، ٹماٹر، پیاز ،دال ماش، اری چاول ،گندم ،خوردنی تیل،ویجی ٹیبل گھی، باسمتی چاول ، ایل پی جی سمیت 10 اشیائے ضروریہ کی قیمتوں میں کمی ریکارڈ کی گئی۔اعدادوشمارکے مطابق پٹرول ،ڈیزل، گیس نرخ ، مٹی کاتیل ، مسٹرڈ آئل، مونگ کی دال، ملک پاڈ، چائے ، بجلی کے نرخ ، کپڑے اور کھلا گھی سمیت 25 اشیائے کی قیمتوں میں استحکام رہا۔ گزشتہ ہفتہ کے مقابلے میں 8ہزار تا12 ہزار آمدنی ، 12 ہزار تا 18 ہزارآمدنی ، 18 ہزار تا 35ہزار تک اور 35ہزار روپے سے زائد آمدنی والے افراد کے گروپوں کیلئے قیمتوں کے حساس اعشاریہ میں بالترتیب 0.24، 0.24 ،0.25 اور 0.27 فیصداضافہ ریکارڈ کیا گیا۔