لاہور(این این آئی) لاہور ہائیکورٹ نے بچے کی بازیابی سے متعلق کیس میں عبوری تحریری حکم نامہ جاری کرتے ہوئے کہا ہے کہ وزیراعلی پنجاب 16فروری تک بچہ بازیاب کروائیں یا خود عدالت میں پیش ہوکر وضاحت دیں۔عدالت نے تین سالہ عبدالرافع کے باپ سے بازیابی کیلئے بچے کی والدہ یاسمین رشید کی درخواست پر تحریری حکم نامے میں کہا ہے کہ 16 فروری تک بچہ بازیاب نہ کروایا گیا

تو وزیراعلی پنجاب عثمان بزدار خود پیش ہو کر وضاحت دیں۔یاسمین رشید کی درخواست پر لاہور ہائیکورٹ کے جج جسٹس طارق عباسی نے وزیراعلی پنجاب کو طلب کرنے کا عبوری حکم نامہ جاری کیا۔تحریری حکم نامہ میں کہا گیا ہے کہ عدالت میں آئی جی پنجاب پولیس سمیت دیگر افسران پیش ہوئے۔ پولیس افسران نے عدالت میں بے بسی کا اظہار کیا اور بچے کی بازیابی کے لیے وقت کے تعین سے معذرت کرتے رہے۔ہائیکورٹ نے تحریری حکم نامہ میں کہا ہے کہ عدالت کے پاس وزیر اعلی پنجاب کو طلب کرنے کے علاوہ کوئی چارہ نہیں ۔واضح رہے کہ تین سالہ عبدالرافع کی والدہ نے تھانہ کوٹ لکھپت میں بچے کے اغوا ء کا مقدمہ بھی درج کروا رکھا ہے۔

موضوعات:لاہور ہائیکورٹ