لاہور (نیوز ڈیسک) لاہور میں مردہ، لاغر اور بیمار مرغیوں کی سپلائی کی کوشش ناکام بنا دی گئی۔ ڈائریکٹر جنرل پنجاب فوڈ اتھارٹی عرفان میمن کی سربراہی میں ٹولنٹن مارکیٹ لاہور میں صحت دشن عناصر کیخلاف کریک ڈاؤن کیا گیا۔بیمار اور مردہ مرغیوں کے سپلائر گرفتار جبکہ 32من مرغیاں ضبط کرلی گئیں۔
پنجاب فوڈ اتھارٹی کی میٹ سیفٹی ٹیموں نے ڈائریکٹر جنرل کی سربراہی میں کارروائی کرتے ہوئے ٹولنٹن مارکیٹ سے 32 من مرغیاں برآمدکر لیں۔بیمار اور مردہ مرغیوں کا گوشت فروخت کرنے والے 6 پوائنٹس سیل کر دیئے گئے۔ مکروہ دھندے میں ملوث طارق چکن، قاسم چکن، نوید چکن،عدنان چکن شاپ،راجو چکن سیل سنٹر اور علی ہجویری چکن ہول سیل سنٹرکو سیل کیا گیا۔مزید برآں بیمار اور مردہ مرغیاں لانے والے 2 ٹرک بھی پکڑے گئے۔علاوہ ازیں 2 ملزمان گرفتارکرتے ہوئے مقدمہ بھی درج کروادیا گیاہے۔ڈی جی فوڈ اتھارٹی کا کہنا تھا کہ مضر صحت مردہ مرغیوں کو پیمکو بھٹی میں جلا کر تلف کر دیا گیاہے۔عرفان میمن نے عوام سے گزارش کی ہے کہ مرغی کا گوشت خریدتے وقت ہمیشہ صحت مند مرغی کو اپنے سامنے ذبح کروائیں۔پہلے سے ذبح شدہ مرغی کا گوشت خریدنے سے گریز کریں۔واضح رہے کہ مردہ مرغی کو ٹھنڈی یا سرد مرغی کے نام سے پکارا جاتا ہے اور عموماً ان ٹھنڈی مرغیوں کی سپلائی بڑے بڑے ہوٹلوں میں کی جاتی ہے، عوام کو مردہ مرغیاں کھلائی جاتی ہیں لیکن کسی کو کچھ پتہ نہیں چلتا۔ اب فوڈ اتھارٹی نے ان عوام دشمن عناصر کے خلاف کریک ڈاؤن کیا ہے اور مردہ اور بیمار مرغیاں ضبط کر لی ہیں۔
