لاہور(این این آئی) پاکستان مسلم لیگ(ن) لاہور کے صدر و رکن قوم اسمبلی محمد پرویز ملک اور جنرل سیکرٹری خواجہ عمران نذیر نے کہا ہے کہ قرض لینے پر خودکشی کادعویٰ کرنیوالوں نے 16ماہ میں 11 ہزار ارب قرض لیکر اپنی نالائقی ثابت کردی،

گیس بجلی پیٹرولیم مصنوعات سمیت عام آدمی کے استعمال کی اشیاآلو، پیاز، ٹماٹر، دالیں، روٹی، مہنگی عوام کی پہنچ سے دور ہو چکی ہے نوکریاں دینے کی بجائے مزید 25 لاکھ لوگوں کو بے روزگار کر دیا ہے گیس، بجلی، ادویات میں دو سو فیصد تک اضافہ ہو چکا ہے وزراسیاسی بیان بازی کے سوا کچھ نہیں کر رہے ملک پر ایک مافیا کی حکومت ہے جو عوام کے مسائل حل کرنے میں بری طرح ناکام نظر آتی ہے۔ان خیالات کا اظہار انہوں نے گذشتہ روز پارٹی آفس میں رہنماؤں اور کارکنوں سے گفتگو کررتے ہوئے کیا۔اس موقع پر سید توصیف شاہ، رمضان صدیق بھٹی، کرنل مبشر جاوید،میاں طارق،نذیر خان سواتی،رانا احسن شرافت سمیت دیگر بھی موجود تھے۔ انہوں نے کہا کہ ہمارا اور عوام کا رشتہ کوئی نہیں توڑ سکتا ہم چاہتے ہیں کہ باشعور عوام کو سیاسی قوتوں اور انکی کارکردگی کا پتہ چلنا چاہیے۔ انہوں نے کہا کہ پارلیمینٹ پہ حملہ، منتخب وزیراعظم کے خلاف سازش، سرکاری املاک پہ حملہ، پارلیمان پہ لعنت کون سا جمہوری عمل ہے، اگر بلا تفریق احتساب ہے تو اپنے نئے باس کے سارے بچوں، ساری بیویوں اور سارے فارن اکاؤنٹس کو ڈکلیر کروائیں اصلی چور اب پکڑا گیا ہے جو بیس سال سے شور مچا رہا ہے اور دوسروں کو چور کہ رہا ہے۔