لاہور( آن لائن )نئی نویلی دلہن کی ولیمے کی صبح پراسرار موت ہو گئی۔تفصیلات کے مطابق صوبائی دارالحکومت میں نئی نویلی دلہن کی گھر سے لاش برآمد ہوئی ہے جس سے خوشیاں بھرا گھر ماتم میں تبدیل ہو گیا ہے۔بتایا گیا ہے کہ فیکٹری ایریا میں گھر میں ایک دن کی دلہن کی پراسرار طور پر موت ہو گئی ہے۔32 سالہ سویرا کی گذشتہ روز شادی ہوئی تھی تاہم صبح اس کی لاش برآمد ہوئی ہے۔

متعلقہ تھانے کی پولیس کا کہنا ہے کہ خاتون کے شوہر کو بھی تشویشناک حالت میں اسپتال منتقل کر دیا گیا ہے جہاں اس کی جان بچانے کی کوشش کی جا رہی ہے۔پولیس نے شبہ ظاہر کیا ہے کہ دلہن کی موت دم گھٹنے سے ہوئی ہے۔تاہم اصل حقائق پوسٹ مارٹم رپورٹ سامنے آنے کے بعد ہی پتہ چل سکیں گے۔دلہن کی ہلاکت پر خوشیوں بھرے گھر میں صف ماتم بچھ گئی اور عزیزو اقارب دھاڑیں مار مار کر روتے رہے۔گذشتہ ہفتے ایسا ہی واقعہ مانسہرہ کے علاقے پیش آیا ۔ جہاں نوبیاہتا جوڑا شادی کی رات ہی جاں بحق ہو گیا۔ بتایا گیا کہ جوڑا رات کو ہیٹر لگا کر سو گیا ، اہلخانہ کا کہنا تھا کہ صبح جواب نہ ملنے پر دروازہ توڑ ا تو دونوں کی لاشیں ملیں۔ گزشتہ روز جوڑا شادی کے بندھن میں بندھا تھا۔ رات کمرے میں ہیٹر لگانے سے کمرے سے آکسیجن ختم ہو گئی جس سے دونوں کی موت واقعہ ہوئی۔یاد رہے اس سے قبل مری میں گیس ہیٹر جلاکر سونے والے دلہا دلہن سمیت 7 افراد دم گھٹنے سے جاں بحق ہوگئے تھے ۔ مری کے علاقے کشمیری بازار موہڑہ عیسوال میں نیا شادی شدہ جوڑا دم گھٹنے سے جاں بحق ہوگیا ۔ شوکت عرف شوکی شادی ہوئی تھی ۔پولیس کے مطابق مری میں برفباری جاری تھی اور شدید سردی کی وجہ سے دلہا دلہن گیس ہیٹر جلا کر سوئے لیکن کمرے میں ہوا کا گزر نہ ہونے کی وجہ سے صبح سویرے مردہ حالت میں پائے گئے تھے ۔