اسلام آباد(مانیٹرنگ ڈیسک)پی آئی سی لاہور میں وکلاء کی جانب سے ہنگامہ آرائی کے باعث 12 مریض دم توڑ گئے ،جب کہ وکلا کے تشدد کے باعث25ڈاکٹرز بھی شدید زخمی ہیں ، دوسری جانب صوبائی وزیر فیاض الحسن چوہان کو بھی شدید تشدد کا نشانہ بنایا گیا،نجی ٹی وی کے مطابق وکلاء ایم ایس آفس کے باہر پتھراؤ کرتے رہے جبکہ پولیس خاموش تماشائی بنی رہی۔وکلاء نے صحافیوں سے بھی بدتمیزی کی،موبائل فونز اور کیمرے بھی چھین لیے۔

پولیس کی بھاری نفری بھی پی آئی سی میں موجود ہے۔پی آئی سی ایمرجنسی کی چھت پر بھی پولیس کی بھاری نفری تعینات کر دی گئی ہے۔وکلاء ایمرجنسی کا دروازہ کھول کر زبردستی اندر داخل ہو گئے۔ آپریشن کے دوران عملہ جان بچانے کے لیے فوراََ باہر نکل گیا۔ وکلاء نے مطالبہ کیا ہے کہ تشدد کرنے والے ڈاکٹرز ہمارے حوالے کیے جائیں۔ واضح رہے کہ ڈاکٹرز نے گزشتہ روز پریس کانفرنس میں دوسری بار وکلاء سے معافی مانگی تھی۔