لاہور(نیوزڈیسک) پی سی بی کاگورننگ بورڈ ہفتے کو این سی اے لاہور میں اجلاس کے دوران کرکٹ کمیٹی کے مستقبل پر غور کرے گا،اس موقع پر پاک زمبابوے سیریزاور سپر لیگ منعقد کرنے پربھی بات ہوگی۔
تفصیلات کے مطابق پی سی بی گورننگ بورڈ کا 36واں اجلاس ہفتے کو نیشنل کرکٹ اکیڈمی میں ہوگا، اس میں ارکان مختلف امور پر غور کریں گے، زمبابوے کیخلاف کامیاب سیریز اور مستقبل میں دیگر غیرملکی ٹیموں کی آمد کے امکانات پر گفتگو کی جائے گی، گذشتہ دنوں کراچی میں چیئرمین بورڈ شہریار خان نے شکیل شیخ کی سربراہی میں کام کرنے والی کرکٹ کمیٹی کو ختم کرنے کی بات کہی تھی۔
انھوں نے سابق کرکٹرز پر مشتمل کمیٹی بنانے کا کہا تھا،ذرائع کے مطابق شکیل شیخ کے تحت سرگرم کمیٹی اپنی افادیت ثابت نہیں کرسکی،اس کے مستقبل پر بھی اجلاس میں بات ہوگی، بھارتی وزیر اعظم نریندر مودی کے بیانات سے پیدا ہونے والی سیاسی کشیدگی کے سبب دسمبر میں یو اے ای میں پاک بھارت سیریز کو لاحق خدشات پربھی غور کیا جائے گا۔
منسوخی کی صورت میں متبادل آپشنز بہت کم ہیں،مگر اس فارغ وقت کو کسی نہ کسی طور کار آمد بنانے کیلیے تجاویز طلب کی جائیں گی، پی سی بی کے عہدیدار خاص طور پر ایگزیکٹیو کمیٹی کے سربراہ نجم سیٹھی پاکستان سپر لیگ کے انعقاد کیلیے ایک بار پھر سرگرم ہوگئے ہیں، ایک غیر ملکی فرم کی طرف سے مجوزہ پلان پر غور کرنے کے بعد ایونٹ یو اے ای میں کرانے کیلئے ارکان سے آرا طلب کی جائے گی۔