صنعاء (این این آئی) یمن کی آئینی حکومت نے عرب اتحاد کی کارروائیوں سے متعلق ترکی کے صدر رجب طیب ایردوآن کے بیان کی مذمت کرتے ہوئے اسے اشتعال انگیز قرار دیا ہے۔ایک بیان میں یمنی حکومت نے کہا کہ ایردوآن نے ترکی کی جانب سے شام کی خود مختاری کی خلاف ورزی کا باطل موازنہ یمن میں سعودی عرب کے زیر قیادت عرب اتحاد کی کارروائیوں سے کرنے کی کوشش کی، جبکہ عرب اتحاد کی کارروائیاں صدر عبدربہ منصور ہادی کی درخواست پر عمل میں لائی جا رہی ہیں تا کہ ایران نواز حوثی ملیشیا کی بغاوت کا خاتمہ کیا جا سکے۔بیان میں مزید کہا گیا کہ یمن میں عرب اتحاد کا آپریشن اپنے دفاع کے

اصولی بنیاد پر مبنی ہے جو کہ اقوام متحدہ اور عرب لیگ کے منشوروں کے علاوہ عرب ممالک کے مشترکہ دفاع کے سمجھوتے کے متن میں بھی موجود ہے۔یمنی حکومت نے یمنی عوام اور حکومت کی سیاسی، عسکری، اقتصادی اور امدادی سپورٹ کے سلسلے میں سعودی عرب کے کردار کو گراں قدر قرار دیا، جبکہ ایران حوثی ملیشیا کو سپورٹ کر رہا ہے تا کہ وہ یمنی عوام کے خلاف کارستانیوں اور ریاسی اداروں کو سبوتاژ کرنے کا سلسلہ جاری رکھے۔یمنی حکومت نے باور کرایا ہے کہ وہ شامی عرب عوام کے ساتھ کھڑی ہے اور شام کی پوری اراضی پر خود مختاری کے حوالے سے شامیوں کے حق کو سپورٹ کرتی ہے۔

موضوعات:یمن،عرب اتحاد،ترکی،طیب ایردوآن،یمنی حکومت