اسلام آباد (مانیٹرنگ ڈیسک) وزیراعظم عمران خان کی اقوام متحدہ میں تقریر پر دنیا بھر میں تبصرے پیش کیے جارہے ہیں وہیں پاکستانیوں سمیت عالم اسلام میں تقریر کو سراہا جارہا ہے ۔ ن لیگی رہنما نے بھی عمران خان کو اسلامی دنیا کا لیڈر قرار دیدیا ۔
تفصیلات کے مطابق پاکستان مسلم لیگ ن کے رکن پنجاب اسمبلی مولانا غیاث الدین نے عمران خان کی اقوام متحدہ میں ہونے والی تقریر کی تعریف کرتے ہوئے انہیں اسلامی دنیا کا لیڈر قرار دیا ہے ۔ ان کا کہنا تھا کہ عمران خان نے کشمیریوں کا مقدمہ ایک بہترین طریقے سے پیش کیا ہے ۔ دریں اثنا مسلم لیگ(ن) کے رہنما احسن اقبال نے اقوام متحدہ میں وزیراعظم عمران خان کی تقریرکو خوش آئندقرار دیدیا۔لاہور میں میڈیا سے گفتگو کرتے ہوئے احسن اقبال نے کہا کہ عمران خان نے مینار پاکستان پربھی اچھی تقریر کی تھی مگر یوٹرن بھی لیے، امید کرتے ہیں کہ عمران خان اقوام متحدہ کی تقریر پر قائم رہیں گے، اگر یوٹرن لیے گئے تو قوم آپ کو یوٹرن لینے نہیں دے گی۔انہوں نے کہا کہ حکومتتقریر کو اپنی ناکامیوں کے پیچھے چھپنے کے لیے ڈھال نہیں بناسکتی، اب وزیر اعظم کی تقریر کا کاونٹ ڈاون شروع ہوگیا ہے، اگر حکومت ٹھوس قدم اٹھائے گی تو اپوزیشن حمایت کرے گی، اگر حکومت کشمیر کے مسئلے پر قومی اتفاق رائے سے قدم اٹھاتی ہے تو اپوزیشن دو قدم آگے ہوگی۔احسن اقبال نے کہا ہے کہ حکومت کے انتقامی کھیل آج بھی جاری ہیں، آنے والی نسلوں کو کیسا نظام عدل دے کر جائیں گے۔
