لاہور( این این آئی )ایران پاک فیڈریشن آ ف کلچر اینڈ ٹریڈ کے صدر خواجہ حبیب الرحمان نے ایران سے متعلق امریکی پابندیوں کودوہرے معیار کا شاخسانہ قرار دیتے ہوئے کہا کہ کئی ملکوں کو ایران سے تیل خریدنے کی اجازت ہے جبکہ پاکستان کے ایران سے توانائی تعاون کو منفی نگاہ سے دیکھتا ہے،امریکی دبائو کے تحت پاکستان ایران کی کئی پیشکشوں سے فائدہ نہیں اٹھا پا رہا۔
ان خیالات کا اظہار انہوں نے پاک ایران تجارت کے فروغ کیلئے منعقدہ اجلاس سے خطاب کرتے ہوئے کیا۔اجلاس کے شرکاء نے مسئلہ کشمیر پر پاکستانی موقف کی بھرپور حمایت اور پارلیمنٹ سے قرار داد کی منظوری پر اظہار تشکر کرتے ہوئے حکومت سے مطالبہ کیا کہ ایرانی رہبر اعلیٰ کو نشان پا کستان سے نوازا جائے۔خواجہ حبیب الرحمان نے کہا کہ پاک ایران تجارت کا فروغ وقت کی ضرورت ہے، دوطرفہ تجارتی حجم کو 300 ملین ڈالر سے5ارب ڈالر تک لے جانے کیلئے ٹھوس اقدامات کرنا ہوں گے جبکہ دوطرفہ تجارت کو فروغ دینے کیلئے کوئٹہ،تفتان اور زاہدان کی ریلوے لائن کو بھی بہتر بنانے کے لئے تیزی سے کام کرنا ہو گا۔انہوں نے کہا کہ تفتان کے علاقے میں پاک ایران مشترکہ مارکیٹ بنانے کے فیصلے پر فوری عملدرآمد کی ضرورت ہے اس سے نہ صرف دو طرفہ تجارتی حجم میں اضافہ ہو گا بلکہ روز گار کے نئے مواقع بھی میسر آ ئیں گے۔انہوں نے مزید کہا خطے میں توانائی شعبے میں اجتماعی تعاون کیلئے ایران کے ساتھ موجودہ گیس منصوبے کی جلد تکمیل ناگزیر ہے کیونکہ ایرانی گیس منصوبہ 750 ایم ایم سی ایف ڈی گیس کی فراہمی کی صلاحیت رکھتا ہے لہٰذااس منصوبے کو تیزی کی بنیاد پر 24 مہینوں میں کیا جاسکتا ہے۔
