اسلام آباد(آئی این پی)آڈیٹر جنرل جاوید جہانگیر نے کہا ہے کہ ریٹائرڈ سرکاری ملازمین، پنشنرز اور سرکاری ملازمین کو جدید ترین ٹیکنالوجی کی مدد سے بہتر اور بر وقت سہولیات کی فراہمی اولین ترجیح ہے اور پنشن ادائیگیوں کے پیشگی نظام سے تمام ریٹائرڈ ملازمین کو بہتر اور بروقت سہولیات مہیا کی جا سکیں گی۔

جبکہ پنشنرز کو درپیش مشکلات اور مسائل کے حل سے ”اے جی پی آر“ کے موجودہ اور حالیہ اقدامات قابل ستائش اور میرے لئے باعث مسرت ہیں۔ انہوں نے ان خیالات کا اظہار ”اے جی پی آر“ ہیڈآفس میں ریٹائرڈملازمین اور پنشنرز کو پنشن کی پیشگی ادائیگی کے جدید ترین کمپیوٹرائزڈ نظام اور پنشنرز کارڈ کے اجراء کا افتتاح کرتے ہوئے کیا۔ آڈیٹر جنرل نے کہا کہ اداروں کو مضبوط بنانے کیلئے کئے جانیوالے اقدامات سے عوام الناس بالعموم اور سرکاری ملازمین کو بالخصوص بہتر خدمات مہیا کی جا سکیں گی۔انہوں نے کہا کہ آج کے دور میں حکومتی مشینری اور اداروں میں کام کرنے کا طریقہ کار انفارمیشن ٹیکنالوجی کے استعمال کی وجہ سے تیزی سے تبدیل ہور ہا ہے۔ماضی میں پنشنرز اور سرکاری ملازمین کو کافی مشکلات کا سامنا رہاتاہم اب جدید ترین کمپیوٹرائزڈ نظام سے ادائیگیوں اور پنشن کی پیشگی ادائیگی میں مدد ملے گی۔پنشن کے نظام کو مزید بہتر کرنے کیلئے بھی دو اہم ترین اقدامات کئے گئے ہیں جن کے تحت ریٹا ئر ہونیوالے افراد کو تنخواہ کی ادائیگی والے پے رول کے تحت خود کار طریقہ سے 65فیصد پنشن پیشگی ادا کر دی جائے گی اور ان ریٹائرڈ افراد کو پنشن کی تمام درکار دستاویز ات کو پورا کرنے کیلئے ایک سال دیا جائے گا جبکہ ریٹائرڈ ہونیوالے سرکاری ملازمین کی شناخت کو آسان بنا دیا گیا ہے اور پنشنرز کو شنا ختی کارڈ جاری کئے جار ہے ہیں۔

اکا ؤنٹنٹ جنرل نے تقریب کے حاضرین کو بتایا کہ ماضی میں پنشنروں کو سرکاری طور پر شناخت، پنشن کی ادائیگی بر وقت شر وع ہونے، پنشن کی بحالی میں تاخیر اور خط وکتابت جیسے کئی مسائل کا سامنا تھا جبکہ ہم نے حالیہ ماضی میں بڑی انتھک اور مخلصانہ کوششوں سے ریٹائرڈ ہونیوالے اور پنشنرز حضرات کے مسائل کو حل کیا۔ انہوں نے کہا کہ ڈائر یکٹ کر یڈ ٹ سسٹم متعا رف کروائے جانے سے اب پنشن بک کی جگہ ماہانہ پنشن سلپ ہو گی لہٰذا پنشنرز کی دستاویز ات جیسے پنشنرز کارڈ اجراء کیاجا رہا ہے اور اس ضمن میں پنشنرز کے شناختی کارڈ کا اجر اء بھی کر دیا گیا ہے انہوں نے کہا کہ اے جی پی آر اور اس کے ذیلی دفاتر میں پنشن کے سہولیاتی مراکز کو جدید ترین خطوط پر استوار کیاجا رہا ہے اور جلد ہی ملازمین کو ان کے کیسوں کی ادائیگیوں کی تازہ ترین صورتحال سے آگاہ کرنے کیلئے ایس ایم ایس سروس بھی شروع کر دی جائے گی۔