اسلام آباد(مانیٹرنگ ڈیسک)یوم آزادی پاکستان 14 کے بجائے 15 اگست کو منانے سے متعلق درخواست ناقابل سماعت قرار،نجی ٹی وی کے مطابق لاہور ہائیکورٹ میں جسٹس مامون رشید نے مقامی شہری محمد حسنین کی درخواست پر سماعت کی۔درخواست گزار کی جانب سے ایڈووکیٹ شہباز اکمل جندران نے دلائل دئیے۔درخواست میں وفاقی حکومت ، وزارت داخلہ، ہائیر ایجوکیشن اور تعلیمی نصاب بورڈ پنجاب کو فریق بنایا گیا تھا۔

درخواست گزار نے موقف اختیار کیا تھا کہ انڈین انڈی پینڈینس ایکٹ 1947 کے مطابق پاکستان کا یوم آزادی 15 اگست ہے،وفاقی حکومت ، وزارت داخلہ سمیت فریقین قوم کو گمراہ کر رہے ہیں۔عدالت عالیہ حکومت کو پاکستان کا یوم آزادی 14 اگست کی بجائے 15 اگست کو منانے سے متعلق حکم دے اور اس سلسلے میں باقاعدہ نوٹیفکیشن بھی جاری کرے۔لیکن لاہور ہائیکورٹ نے درخواست ناقابل سماعت قرار دیکر مسترد کردی۔

موضوعات:لاہورہائیکورٹ