اسلام آباد ( مانیٹرنگ ڈیسک) سائنس و ٹیکنالوجی کے وفاقی وزیرفواد چوہدری کا ملک میں پانی کی دکانیں اور واٹر اے ٹی ایم بنانے کا اعلان ،ایک انٹرویو کے دوران وفاقی وزیر فواد چوہدری نے واضح کیا کہ حکومت خود پانی نہیں بنا رہی اور نہ ہی حکومت ایسا کوئی کاروبار کرنے میں دلچسپی رکھتی ہے۔

انہوں نے کہا کہ ملک کی 22 کروڑ آبادی کا 5 فیصد حصہ بازار سے منرل واٹر خریدنے کی سکت رکھتا ہے۔لہٰذا موجودہ حکومت پانی کی دکانوں کے ذریعے عام آدمی کو تقریباً ایک روپے فی لیٹر صاف پینے کا پانی فراہم کرنا چاہتی ہے۔ کیونکہ پینے کا صاف پانی مہیا کرنا حکومت کی بنیادی ذمہ داری ہے ، صاف پانی مہیا ہو گا تو لوگوں میں بیماریوں کی شرح بھی کم ہو گی۔اس پراجیکٹ سے متعلق تفصیلات فراہم کرتے ہوئے فواد چوہدری کا مزید کہنا تھا کہ ملک بھر میں ہر تحصیل کی واٹر سیمپلنگ کی ہے اور اسی سیمپلنگ کے مطابق نجی کمپنیاں پانی صاف کرنے والے پلانٹس بنائیں گی۔ حکومت کے حساس پروگرام سے ہر تحصیل کے لوگوں کو قرضہ ملے گا تاکہ وہ علاقہ کی سطح پر پانی کا کاروبار کر سکیں۔ ان پلانٹس کے پانی کی کوالٹی کسی بھی برانڈڈ بوتل والے منرل واٹر سے کم نہیں ہو گی اور اس کی قیمت 75 پیسے سے ایک روپیہ فی لیٹر تک ہو گی۔ان کا کہنا تھا کہ آپ یوں سمجھ لیں کہ پانی کی دکانیں ہوں گی یا واٹر اے ٹی ایم ہوں گے جہاں سے لوگ پانی وصول کر سکیں گے۔