اسلام آباد (این این آئی)ترجمان مسلم لیگ (ن )مریم اورنگزیب نے وزیراعظم عمران خان کے ٹویٹ پرردِ عمل کا اظہار کرتے ہوئے کہاہے کہ عمران صاحب ٹویٹ سے نوجوانوں کو جھوٹا درس دے کر آپ اپنی نالائقی پہ تنقید کا خوف ختم نہیں کر سکتے ۔

ایک بیان میں انہوں نے کہاکہ عمران صاحب اپنی نالائقی پہ تنقید کے ڈر سے تو آپ نے پوری اپوزیشن اور ہر مخالف آواز بند کر دی ہے ۔ انہوں نے کہاکہ عمران صاحب آپ تنقید سننا برداشت نہیں کرتے اِس لئے ایک سال میں ہر شعبہ میں تبدیلی کی جگہ صرف تباہی ہے ۔ انہوں نے کہاکہ عمران صاحب اگر آپ اپنی نالائقی پہ تنقید برداشت کر سکتے تو آج معیشت ، کاروبار اور روزگار تباہ نہ ہوتا ۔ انہوں نے کہاکہ عمران صاحب اگر آپ اپنی نالائقی پہ تنقید برداشت کر سکتے تو ایک سال میں ترقی کی شرح آدھی اور مہنگائی تین گْنا نہ ہوتی ۔ انہوں نے کہاکہ عمران صاحب اگر آپ اپنی نالائقی پہ تنقید برداشت کر سکتے تو پشاور میٹرو کے ایک کھرب کے کھڈے میٹرو میں تبدیل ہو چْکے ہوتے ۔ انہوں نے کہاکہ عمران صاحب اگر آپ اپنی نالائقی پہ تنقید برداشت کر سکتے تو ایک سال میں گیس دو سو فیصد اور بجلی 45 فیصد نہ ہوتی ،عمران صاحب اگر آپ اپنی نالائقی پہ تنقید برداشت کر سکتے تو آج پولیو کے کیس 62 اور ڈینگی کے مریض ایک ہزار سے زیادہ نہ ہوتے ۔ انہوں نے کہاکہ عمران صاحب اگر آپ اپنی نالائقی پہ تنقید برداشت کر سکتے تو کامیابی سے چلتا ہوا ہر منصوبہ تباہ نہ ہوتا۔