سرینگر(این این آئی)بھارتی صحافی برکھا دت نے انکشاف کیا ہے کہ مقبوضہ کشمیر میں مسلسل مواصلاتی بلیک آؤٹ کی وجہ سے وادی کشمیر کے لوگوں کو شدید مشکلات کاسامنا ہے اور ان کا بیرونی دنیا سے کوئی رابطہ نہیں ہے اور وہ اپنے پیاروں کی خیریت جاننے کیلئے ان سے رابطہ نہیں کر پارہے ہیں۔ کشمیرمیڈیاسروس کے مطابق برکھا دت نے ایک رپورٹ میں کہاکہ ہرگزرتے دن کے ساتھ مقبوضہ کشمیر کی صورتحال تیزی سے بگڑرہی ہے
اور بھارت کے عوام بھی بھارتی فورسز کے ہاتھوں مقبوضہ کشمیرمیں انسانی حقو ق کی پامالیوں کی تصدیق کر رہے ہیں۔ انہوں نے کشمیر کی صورتحال کو تباہ کن قراردیتے ہوئے کہاکہ مقبوضہ علاقے کی صورتحال سلگتے ہوئے آتش فشاں کی طرح ہے جو کسی بھی وقت پھٹ سکتا ہے۔ برکھا دت نے کہاکہ انہوں نے سرینگر کے دورے کے دوران گرفتار کئے گئے کشمیریوں کے بارے میں دریافت کرنے کی کوشش کی تولوگوں نے سیاسی رہنماؤں کی گرفتاری پر بھارتی حکومت کو شدید تنقید کا نشانہ بنایا۔دریں اثناء مقبوضہ کشمیرمیں جموں وکشمیر کی خصوصی حیثیت کی منسوخی اور اسے دو یونین ٹیریٹریز میں تقسیم کرنے کے بھارتی حکومت کے فیصلے کے خلاف احتجاج کیلئے جمعرات کو دوسرے دن بھی پورے ضلع کرگل میں مکمل ہڑتال کی گئی۔ کشمیر میڈیاسروس کے مطابق دوروزہ ہڑتال کی کال ضلع میں تمام مذہبی اور سیاسی جماعتوں پر مشتمل جوائنٹ ایکشن کمیٹی کرگل اور کوآرڈینیشن کمیٹی دراس نے دی تھی۔ ہڑتال کا مقصد مقبوضہ کشمیرمیں سیاسی رہنماؤں کی رہائی اور مواصلاتی سروسز کی بحالی پر زوردینا بھی تھا۔ ضلع کے علاقوں کرگل، سنکو، سرواور دراس میں تمام تجارتی مراکز، سکول، سرکاری اور نجی دفاتر بند رہے۔ بھارتی صحافی برکھا دت نے انکشاف کیا ہے کہ مقبوضہ کشمیر میں مسلسل مواصلاتی بلیک آؤٹ کی وجہ سے وادی کشمیر کے لوگوں کو شدید مشکلات کاسامنا ہے اور ان کا بیرونی دنیا سے کوئی رابطہ نہیں ہے
