اسلام آباد(آن لائن) سابق وزیراعظم کے معاون خصوصی عرفان صدیقی کے خلاف کرایہ داری ایکٹ کے تحت درج مقدمہ میں دو ہفتے گزرنے کے باوجود پولیس کی جانب سے چالان داخل نہ ہونے پر کیس میں کوئی پیش رفت نہ ہو سکی۔کرایہ داری ایکٹ کے تحت درج مقدمہ کی سماعت کے لیے سابق وزیراعظم کے معاون خصوصی عرفان صدیقی کے وکلاء سید پرویز ظہور اور حافظ منور ایڈووکیٹ گذشتہ روز مجسٹریٹ کی عدالت پہنچے تو عدالتی سٹاف نے
بتایا اسسٹنٹ کمشنر مہرین بلوچ نے بطور ڈیوٹی جج سماعت کی تھی، فائل اب ہمارے پاس نہیں، متعلقہ علاقہ مجسٹریٹ عمر رندھاوا اب اس کیس کی سماعت کریں گے۔عرفان صدیقی کے وکیل حافظ منور ایڈووکیٹ نے میڈیا کو بتایا کہ پولیس کی جانب سے ابھی تک چالان داخل نہیں کرایا جا سکا۔ کیس کی مزید سماعت چالان داخل ہونے کے بعد ہو گی یہ بھی یادرہے کہ عرفان صدیقی نے مقدمہ اخراج کے لیے اسلام آباد ہائی کورٹ سے رجوع کر رکھا ہے۔
