اسلام آباد(نیوز ڈیسک)رواں سال جنوری2015 کے مہینے میں فرانسیسی جریدے چارلی ایبڈو پر حملہ کیا گیا جس کے نتیجے میں 12 افراد مارے گئے۔ یہ جریدہ اسلام کے خلاف توہین آمیز خاکے شائع کرنے کے بعد مسلسل تنقید کا نشانہ تھا لیکن حملے کے بعد اسے مغربی ممالک میں کافی حمایت حاصل ہوئی اور یہ خدشہ ظاہر کیا جا رہا تھا کہ اس پر حملے کے بعد یورپ میں مسلمانوں کے خلاف جذبات میں شدت آئے گی لیکن ایک حالیہ تحقیق کے نتائج نے سب کو حیران کر دیا ہے۔بین الاقوامی ادارے پیو ریسرچ سنٹر کی تازہ ترین تحقیق میں انکشاف ہوا ہے کہ مسلمانوں کے خلاف یورپی نفرت میں اضافے کی بجائے واضح کمی ہو چکی ہے۔ سروے سے معلوم ہوا ہے کہ یورپ کے زیادہ تر ممالک میں عوامی رائے مسلمانوں کے حق میں بہتر اور موافق ہوئی ہے۔ فرانس کے 76 فیصد عوام نے کہا کہ وہ مسلمانوں کے لئے مثبت جذبات رکھتے ہیں، گزشتہ سال یہ تعداد 73 فیصد تھی، 24 فیصد نے منفی جذبات کا اظہار کیا۔ برطانیہ میں 72 فیصد نے مسلمانوں کے لئے مثبت جذبات کا اظہار کیا، گزشتہ سال یہ شرح 64 فیصد تھی ۔جرمنی میں مسلمانوں کے لئے مثبت جذبات رکھنے والوں کی تعداد 69 فیصد تھی ۔