اسلام آٓباد(نیوز ڈیسک)یمن کے سابق صدر علی عبداللہ صالح کی وفادار فورسز نے سعودی سرحدی قصبوں پر حملے کیے جو پسپا کردیے گئے۔ جھڑپوں میں 4 سعودی اور درجنوں یمنی حملہ آور مارے گئے۔ سعودی قیادت میں قائم اتحاد نے ایک بیان میں کہاکہ معزول یمنی صدرعلی عبداللہ صالح کےری پبلکن گارڈز کی ایک فارمیشن نے سعودی سرحدی قصبوں جازان اور نجران میںمختلف مقامات پر منظم حملے کیے۔ انہیں حوثی باغیوں کی مدد بھی حاصل تھی۔ سعودی سیکیورٹی فورسز نے بھرپور جواب دیتے ہوئے حملے پسپا کیے جن میں گن شپ ہیلی کاپٹر ، میزائل اور دیگر اسلحہ استعمال کیا گیا۔ جھڑپوں کے دوران 4 سعودی اور درجنوں یمنی حملہ آور مارے گئے۔ سعودی عرب کی قیادت میں قائم اتحاد کی جانب سے یمن میں حوثی باغیوں کے خلاف کارروائی شروع ہونے کے بعد سعودی حدود میں یہ دوسرا بڑا زمینی حملہ ہے۔ اپریل کے آخر میں بھی نجران کے علاقے میں حملہ کیا گیا تھا جس میں 3سعودی فوجی اور درجنوں باغی ہلاک ہوئے تھے۔واضح رہے کہ یمن رواں برس مارچ سے جاری جھڑپوں میں اب تک 2 ہزار سے زائد افراد ہلاک اور 8 ہزار سے زائد زخمی ہو چکے ہیں جب کہ لاکھوں افراد محفوظ مقامات پر نقل مکانی کر چکے ہیں۔