اسلام آباد(این این آئی)وزیراعظم عمران خان نے ایک بار پھر اپوزیشن پر تنقید کرتے ہوئے کہاہے کہ سسلین مافیا کی طرح پاکستانی مافیا بھی ہتھکنڈے استعمال کررہی ہے۔ ہفتہ کو وزیراعظم عمران خان نے ٹوئٹر پر جاری بیان میں اٹلی کے سابق صدر کا مافیا کے حوالے سے دیا گیا ایک بیان شیئر کیا۔

وزیراعظم عمران خان نے کہا کہ پاکستانی مافیا بھی سسلین مافیا کی طرح رشوت، دھمکی، بلیک میل، ریاست و عدلیہ پر دباؤ کے ہتھکنڈے استعمال کررہا ہے تاکہ ان کی اربوں کی منی لانڈرنگ بیرون ملک محفوظ رہے۔دریں اثنا پاکستان مسلم لیگ (ن )کی نائب صدر اور سابق وزیر اعظم میاں نواز شریف کی صاحبزادی مریم نواز نے کہا ہے کہ سیاسی مخالفین کو سزا دینے اور ٹارگٹ کرنے کے لیے عمران خان خود دبائو ڈالتے ہیں۔ ہفتہ کو وزیر اعظم عمران خان کے بیان پر اپنے رد عمل کا اظہار کرتے ہوئے مریم نواز نے سماجی رابطے کی ویب سائٹ ٹوئٹر پر کہا ہے کہ سیاسی مخالفین کو سزا دینے، ٹارگٹ کرنے کیلئے آپ دبائو ڈالتے ہیں۔آپ مافیا کا حصہ ہیں۔انہوں نے وزیر اعظم عمران خان سے مخاطب ہوتے ہوئے مزید کہا کہ آپ کو شرم آنی چاہیے، نواز شریف کو سزا دینے، میدان سے باہر رکھنے کے لیے سازش رچائی گئی۔مریم نواز نے کہا کہ شرم آنی چاہیے، آپ اس سازش میں شامل ہیں اور قصور وار ہیں، آپ کا بھیانک چہرہ پوری دنیا نے دیکھ لیا ہے، سلیکٹڈ تو تھے ہی، اب آپ کے گھنائونے کردار پر بھی مہر لگ چکی ہے۔نائب صدر مسلم لیگ (ن )نے کہا کہ ظلم و جبر کے پہاڑ توڑ دیئے گئے، سیاسی انتقام کی تمام حدیں عبور کرلی گئیں، مگر نواز شریف کو توڑنے اور جھکانے کا خواب دیکھنے والے آج بھی ناکام و نامراد ہیں۔