لاہور (نیوزڈیسک) صوبائی وزیرقانون رانا ثناءاللہ خاں نے کہا ہے کہ جے آئی ٹی رپورٹ سے جھوٹ کا جھوٹ اور سچ کا سچ سامنے آ گیا مگر پی ٹی آئی مرضی کے مطابق فیصلے حاصل کرنا چاہتی ہے، تحریک انصاف 2018ءتک عوام کی خدمت کی بجائے بے بنیاد واویلا کرتی رہے گی۔ صوبائی وزیرقانون رانا ثناءاللہ خان نے پی ٹی آئی رہنماﺅں کے بیانات پر تبصرہ کرتے ہوئے کہا کہ وقت آ گیا ہے عمران خان اور ان کے حواری سیاست میں سنجیدہ طرزعمل اختیار کریں۔ پی ٹی آئی اقتدار کے حصول میں مایوس ہو کر نان ایشوز کی سیاست کر رہی ہے۔ تحریک انصاف کے رہنماﺅں کا طرزعمل ہی ان کے جھوٹے ہونے کا واضح ثبوت ہے۔ رانا ثناءاللہ نے کہا کہ تحریک انصاف کو اپنی سیاست چمکانے کے لئے ہر روز ایک نیا جھوٹ درکار ہے۔ تحریک انصاف کے رہنما قوم کو گمراہ کرنے کی کوشش نہ کریں۔ اقتدار کی ہوس نے پی ٹی آئی قیادت کو حواس باختہ کر دیا ہے۔ انہوں نے کہا کہ خیبرپختونخوا کے بلدیاتی انتخابات میں تبدیلی کا نعرہ لگانے والوں کے طرزعمل نے ان کی قلعی کھول دی ہے