لاہور(این این آئی)سابق صدر لاہور چیمبرز آف کامرس فاروق افتخار نے حکومت کے آئی ایم ایف کے ساتھ مذاکرات میں 750ارب روپے سے زائد کے نئے ٹیکس لگانے کا ورکنگ پلان آئی ایم ایف کو پیش کرنے پر تشویش کا اظہار کرتے ہوئے کہا ہے کہ آئی ایم ایف کے ایما پر بجلی ، گیس اور
پٹرولیم مصنوعات سمیت دیگر اشیاء پر اربوں روپے کے ٹیکسز عائد کرنے سے ملک میں مہنگائی کا نہ ختم ہونے والا سلسلہ شروع ہوگا ۔جبکہ پاکستان سٹون ڈویلپمنٹ کمپنی کے بور ڈ آف ڈائریکٹرز کے رکن خادم حسین سینئر نائب صدر خادم حسین نے کہا کہ750ارب کے نئے ٹیکسوں سے صنعتی شعبہ سمیت عوام متاثر ہوگی اور ان کی قوت خرید ختم ہوجائے گی ،نئے ٹیکسوں سے ملک میں ہوشربا مہنگائی جنم لے گی جس سے ہر طبقہ فکر متاث ہوگا ۔انہوں نے کہا کہ 6ارب ڈالر کے قرض سے ملک میں کبھی بھی خوشحالی نہیں آئے گی ۔ پٹرول کی قیمتوں میں ہوشربا اضافہ سے عوام ابھی سنبھلنے بھی نہ پائے تھے کہ حکومت کی طرف سے دو سال تک بجلی کی قیمتوں میں مسلسل اضافے کی نوید نے عوام کو بوکھلا کر رکھ دیا ہے ۔ عوام تبدیلی کی توقع کر رہے ہیں لیکن تبدیلی کے نام پر ان پر ٹیکسوں کا ہوشربا بوجھ ڈالا جارہا ہے جس سے ان کی قوت خرید بھی ختم ہوتی جارہی ہے۔انہوںنے کہا کہ خودانحصاری اور کفایت شعاری کی پالیسی کو اپنایا جائے اور آئی ایم ایف کو ہمیشہ کیلئے خیر باد کہا جائے کیونکہ ان کی شرائط پر عمل پیرا ہوکر عوام کو بدحالی کی طرف گامزن کردیا گیا ہے۔
