کراچی(این این آئی)تحریک انصاف کے یوم تاسیس میں بدنظمی کی وجہ 2 رہنمائوں کے درمیان اختلافات بتائی جارہی ہے، تحریک انصاف کے مرکزی چیف آرگنائزر سیف اللہ نیازی نے جلسے میں بدنظمی کا نوٹس لے لیا ۔تحریک انصاف کے ذرائع کے مطابق خرم شیر زمان اور رکن قومی اسمبلی سیف الرحمن میں یوم تاسیس کی تقریب میں تلخ کلامی ہوئی۔

جس کے بعد سیف الرحمن جلسہ گاہ چھوڑ کر چلے گئے تھے۔ ذرائع نے بتایا کہ سیف الرحمن کے حامیوں نے جلسہ گاہ کے اگلے حصے میں پہنچنے کی کوشش کی لیکن ان کو کامیابی نہ ہو سکی۔جس کے بعد سیف الرحمن کے حامی مرکزی جلسہ گاہ میں پہنچ گئے۔ تحریک انصاف کے ایک رہنما نے نام نہ بتانے کی شرط پر بتایا کہ اعلی قیادت کو تمام صورتحال سے آگاہ کیا جائے گا اور سیف الرحمن اور خرم شیر زمان کے خلاف کاروائی کا امکان ہے۔دوسری جانب تحریک انصاف کے مرکزی چیف آرگنائزر سیف اللہ نیازی نے جلسے میں بد نظمی کا نوٹس لے لیا ہے۔اس حوالے سے ان کا کہنا تھا کہ اس واقعے میں جو عناصر ملوث ہیں ان کے خلاف سخت کارروائی کی جائے گی۔ ترجمان پی ٹی آئی عمر سرفراز چیمہ کے مطابق واقعے کی تحقیقات اور ذمہ داران کے تعین کی ہدایت کر دی گئی ہے۔واقعے کے تصویری اور ویڈیو شواہد اکٹھے کیے جا رہے ہیں، بد نظمی میں ملوث افراد سے کوئی نرمی نہیں برتی جائے گی۔ترجمان کے مطابق شر پسند عناصر کے خلاف سخت کارروائی عمل میں لائی جائے گی، کارکنان ملوث ہوئے تو سخت انضباطی کارروائی کا سامنا کرنا ہوگا۔