لاہور( این این آئی)پرائس کنٹرول کمیٹی کے سابق چیئرمین میاں عثمان نے کہا ہے کہ رمضان المبارک کے آغاز سے قبل ہی مہنگائی کو طوفان آ گیا ہے جو تشویش کا باعث ہے ،اپریل کے پہلے دس روز میں کم آمدنی والے طبقے کیلئے حساس اشاریوں میں0.35فیصد اضافہ ہوا ہے۔
اور اس میں روزانہ کی بنیاد پر اضافہ ہو رہا ہے ، یوٹیلٹی سٹورز کو عوام کیلئے ریلیف کا ذریعہ بنانا ہے تو اشیائے خوردونوش کی فراہمی کو یقینی بنایا جائے ۔ ان خیالات کا اظہار انہوں نے مختلف علاقوں سے تعلق رکھنے والے صارفین کے نمائندہ وفد سے ملاقات میں گفتگو کرتے ہوئے کیا ۔ میاں عثمان نے کہا کہ حکومت کی جانب سے اشیائے خوردونوش کی قیمتوں کے حوالے سے کوئی مضبوط میکنزم نہیں تیار نہیں کیا گیا ۔پرچون دکانداروں کا شکوہ ہے کہ جو سرکاری ریٹ لسٹ جاری کی جارہی ہے اس کے مطابق تھوک مارکیٹوں اور ہول سیلرز سے اشیائے خوردونوش دستیاب ہی نہیں اور17سے 30فیصد زائد قیمتوں پر فروخت کی جارہی ہے ۔ انہوں نے کہا کہ حکومت نے ابھی تک رمضان المبارک میں اشیائے خوردونوش کی طلب کی رپورٹ تیار نہیں کی جس سے بحران پیدا ہونے کا خدشہ ہے ۔ گراں فروشوں کو پیشگی متنبہ کیا جائے اور ان کے خلاف ہر سطح پر کریک ڈاؤن کا آغاز کیا جائے تاکہ عوام ان سے محفوظ رہ سکیں۔
