راولپنڈی(اے این این ) اڈیالہ جیل میں منشیات فروشی کے مقدمے میں سزا کاٹنے والے2 قیدی پراسرار طور انتقال کرگئے۔ذرائع کے مطابق بشارت اور عباس نامی قیدی منشیات فروشی کے کیس میں سزا یافتہ تھے اور اڈیالہ جیل میں قید کاٹ رہے تھے، بشارت سزا کے طور پر سیل میں بند تھا جب کہ عباس کو بیرک میں رکھا گیا تھا، دونوں قیدیوں کی لاشیں صبح بیرکوں سے ملیں جس کی جیل انتظامیہ کی جانب سے بھی تصدیق کی گئی ہے۔ذرائع نے بتایا کہ دونوں

قیدیوں کی رات اچانک طبیعت خراب ہوئی تاہم جیل انتظامیہ کی جانب سے دونوں کو نہ طبی امداد دی گئی اور نہ ہی ہسپتال منتقل کیا گیا۔ذرائع کا کہنا ہے کہ اڈیالہ جیل میں قیدیوں کا علاج نہیں کیا جاتا اور جیل میں موجود اسپتال میں علاج کی سہولیات نہیں ہیں، انتظامیہ کی جانب سے دونوں قیدیوں کو فوری طبی امداد فراہم نہ کرنے انتظامیہ کی غفلت اور لاپرواہی ہے۔جیل انتظامیہ کے مطابق قانونی کارروائی کے بعد دونوں لاشیں ورثا کے حوالے کردی جائیں گی۔