کراچی(سی پی پی)سابق صدر پرویز مشرف AMYLOIDSIS کی بیماری میں مبتلا ہیں اوردبئی اسپتال میں زیرعلاج ہیں۔نجی ٹی وی کے مطابق پرویز مشرف کے قریبی رفقا کا کہنا ہے کہ یہ مرض انھیں 6 ماہ قبل لاحق ہواتھا۔

طبی ٹیسٹوں میں مرض کی تشخیص کی گئی ہے جس کا علاج پاکستان میں موجود نہیں، اس لیے وہ دبئی میں زیر علاج ہیں۔اس مرض میں پلازما سیل سے خارج ہونے والی پروٹین دل، گردے اور پٹھوں میں جمع ہونے کی وجہ سے قلب بھی متاثر ہوتا ہے، انسانی جسم میں پلازمہ سیل ہڈیوں کے اندر ہوتے ہیں جن کاکام جسم میں اینٹی باڈیز بنانا ہوتا ہے لیکن اس مرض میں پلازمہ سیل اینٹی باڈیز بنانے کی بجائے غیر فعال اور نقصان دہ AMYLOID پروٹین بنانا شروع کردیتے ہیں جس کے نتیجے میں AMYLOIDSIS نامی مرض لاحق ہوجاتا ہے،اس مرض کی تشخیص خون کے ٹیسٹ immunofixationسے کی جاتی ہے۔اس مرض کی وجہ سے اعصابی مرض بھی لاحق ہوتا ہے، جسم میں AMYLOID پروٹین جمع ہونے سے دل،گردے اورپٹھے رفتہ رفتہ اپناکام کرناچھوڑدیتے ہیں۔ اس بیماری کی علامات میں جسم میں کمزوری، نقاہت، ہڈیوں کا بھربھراہوجانا،گردوں میں سوجن کی وجہ سے ہاتھ پیروں کا سوج جانا، ہاتھوں اور زبان کی ساخت میں تبدیلی رونما ہونا، زبان کا موٹا ہوجانا شامل ہیں۔