لاہور( این این آئی ) وفاقی وزیر ریلوے شیخ رشید احمدنے ’’کاروان بھٹو ‘‘میں پیپلز پارٹی کے کارکنوں کی جانب سے ٹرین کی بوگیوں پر پکے رنگوں سے نعرے تحریر کرنے پرپیپلزپارٹی سے ہرجانہ لینے کا اعلان کردیا۔پیپلز پارٹی کے کارکنوں کی جانب سے ’’کارروان بھٹو ‘‘ کے لئے حاصل کی گئی ٹرین پر پکے رنگ سے سیاسی مخالفین کے خلاف نعرے تحریر کئے گئے جس میں
غیر اخلاقی زبان بھی استعمال کی گئی ۔شیخ رشید نے ہرجانہ لینے کا اعلان کرتے ہوئے کہا کہ وہ ریلوے کی بوگیوں پرنئے رنگ کے پیسے وصول کرنے کے لیے قانونی راستہ اختیار کریں گے۔ پیپلز پارٹی کے رہنما وڈپٹی چیئرمین سینیٹ سلیم مانڈوی والا کو بل بھجوائیں گے۔شیخ رشید کا کہنا تھا کہ ریلوے کی قانونی ٹیم کو ہدایت کردی ہے اورجلد پیپلزپارٹی کو نوٹس بھیج دیا جائے گا۔
