لاہور(این این آئی)سابق فرسٹ کلاس کرکٹر اقبال امام کو خواتین کی قومی کرکٹ ٹیم کا بیٹنگ کنسلٹنٹ مقرر کئے جانے کا امکان ہے۔ میڈیا رپورٹ کے مطابق سابق فرسٹ کلاس کرکٹر اقبال امام پاکستان کرکٹ بورڈ کے کوالیفائیڈ کوچ ہیں جنہیں اسلام آباد کے ڈائمنڈ گراؤنڈ میں شروع ہونے والے خواتین کے انٹر ڈیپارٹمنٹل ٹورنامنٹ میں ریجن کا کوچ مقرر کیا گیا ۔ پاکستانی ویمن کرکٹ ٹیم کے آسٹریلوی بیٹنگ کنسلٹنٹ اینڈی رچرڈز اپنا عہدہ چھوڑ کر وطن واپس چلے گئے ہیں، جس کے بعد ویمن کرکٹ ٹیم
کے کوچ مارک کولز کے ساتھ بیٹنگ لائن کو بہتر بنانے کیلئے اقبال امام کو خواتین کرکٹ ٹیم کا بیٹنگ کنسلٹنٹ مقرر کئے جانے کا امکان ہے۔پی سی بی انٹر ڈیپارٹمنٹل ویمن کرکٹ ٹورنامنٹ میں زرعی ترقیاتی بینک، اسٹیٹ بینک، ایچ ای سی اور پی سی بی الیون کی ٹیمیں حصہ لیں گی۔ ٹورنامنٹ میں نئی سلیکشن کمیٹی کھلاڑیوں کی کارکردگی کو مانیٹر کرے گی جس کے بعد دورہ جنوبی افریقا کیلئے ممکنہ کھلاڑیوں کا اعلان کیا جائے گا، ممکنہ کھلاڑیوں کا تربیتی کیمپ کراچی میں لگایا جائے گا۔
