نارووال(آن لائن)مسلم لیگ(ن) کے سابق وزیر داخلہ احسن اقبال نے کہا ہے کہ حکومت کو اس وقت انڈر 11 کی طرح کھلایا جا رہا ہے ۔ بھارتی وزیر اعظم نریندر مودی کے پیغام پر وزیر اعظم کو اتنی خوشی ہوئی کہ ٹوئٹ کر دیا ۔ ان خیالات کااظہار احسن اقبال نے نارووال میں ایک تقریب میں شرکت کے بعد صحافیوں سے غیر رسمی گفتگو میں کیا ۔ انہوں نے کہا کہ بھارت نے پاکستان کے خلاف جارحیت کی جس کو پوری دنیا نے دیکھا ۔ کل تک بھارت سے ہمارے

تعلق محاذ آرائی کی طرف تھے لیکن مودی کے ایک پیغام پر وزیر اعظم کو اس قدر خوشی ہوئی کہ ٹوئٹ کر دیا ۔ اس وقت حکومت انڈر 11 کی طرح چلائی جا رہی ہے ۔ انہوں نے ایک سوال کے جواب میں کہا کہ پی ٹی آئی کی حکومت جب سے اقتدار میں آئی ہے عوام پر مہنگائی کا بوجھ بڑھ گیا ہے ۔ حالانکہ حکومت کو چاہئے کہ وہ معیشت کی ترقی پر توجہ دے اور سنجیدگی اختیار کرے لیکن وفاق کو اپوزیشن سے ہر وقت لڑائی کرنے کے لئے تیار رہتا ہے ۔