اسلام آباد (این این آئی)پاکستان مسلم لیگ (ن )کے صدر اور قائد حزب اختلاف شہباز شریف کا لاہور ہائی کورٹ کے فیصلے پر ردعمل کا اظہار کرتے ہوئے کہاہے کہ انشاء اللہ وہ دن دور نہیں جب الزام تراشیوں اور سیاسی انتقام کے بادل چھٹ جائیں گے،قوم اس دن کے منتظر ہیں جس دن نواز شریف ایک مرتبہ پھر ان میں ہونگے۔ جمعرات کو ایک بیان میں انہوں نے کہاکہ اللہ تعالی کا شکر ادا کرتے ہیں کہ اس نے ایک مرتبہ پھر ہم پر کرم فرمایا۔ انہوں نے کہاکہ عدالت کا فیصلہ حق اورسچ کی فتح ہے،اللہ تعالی کے فضل و کرم سے ایک مرتبہ پھر ہر الزام میں سرخرو ہوں گے۔
شہباز شریف نے کہاکہ میں اپنی والدہ ماجدہ، بڑے بھائی محمد نواز شریف ، اپنے خاندان ، پاکستان کے عوام اور پاکستان مسلم لیگ ن کے کارکن کا بے حد شکرگزار ہوں کہ انہوں نے اپنی دعاؤں اور محبتوں میں مجھے یاد رکھا اور میری ہمت بندھاتے رہے۔ انہوں نے کہا کہ میں اپنے وکلاء کا بھی شکریہ ادا کرتا ہوں کہ انہوں نے شبانہ روز محنت اور جذبے سے مقدمہ تیار کیا اور اس کی پیروی کی۔ شہباز شریف نے کہاکہ انشاء اللہ وہ دن دور نہیں جب الزام تراشیوں اور سیاسی انتقام کے بادل چھٹ جائیں گے۔ انہوں نے کہاکہ قوم اس دن کے منتظر ہیں جس دن نواز شریف ایک مرتبہ پھر ان میں ہونگے
