سیالکوٹ(آن لائن)مسلم لیگ(ن) کے سابق وفاقی وزیر خارجہ خواجہ آصف نے کہا ہے کہ پہلی مرتبہ ایک وزیراعظم آئی ایم ایف کے پاس جا رہا ہے ‘ عمران خان نے اقتدار میں آنے کے بعد اپنے ایک بھی نعرے پر عمل نہیں کیا‘حکومت نواز شریف کی بیماری کا سیاسی فائدہ اٹھانا چاہتی ہے‘ شہباز شریف کو پی اے سی چیئرمین شپ سے ہٹانے کا کوئی فائدہ نہیں ہو گا ‘ہم کنٹینر پر چڑھ کر نظام منجمد نہیں کرنا چاہتے ‘

خارجہ پالیسی درست سمت میں نہیں جارہی ‘ این آر او صرف وزیر اعظم کی ہمشیرہ کو دیا گیا ہے‘ عمران خان انتہائی پریشان ہیں ۔اتوار کے روز پاکستان مسلم لیگ (ن) کے سینئر رہنما اور سابق وزیر خارجہ خواجہ آصف نے اپنی رہائش گاہ پر صحافیوں سے بات چیت کرتے ہوئے کہا کہ حکومت نواز شریف کی بیماری کا فائدہ اٹھانا چاہتی ہے حالانکہ دل کے مرض کیلئے ڈاکٹروں کے بورڈ نے جو رائے دی ہے اسے تسلیم کیا جانا چاہئے ۔ لیکن بدقسمتی سے بیماری کا سیاسی فائدہ حاصل کرنے کی کوشش کی جا رہی ہے کیونکہ حکومت خود اپنی دشمن ہے ۔انہوں نے کہا کہ شہباز شریف کو پبلک اکاؤنٹس کمیٹی کی چیئرمین شپ سے ہٹانے کا کوئی فائدہ نہیں ہو گا مگر حالات ضرور بگڑ جائیں گے کیونکہ ہم کنٹینر پر نہیں چڑھنا چاہتے ہیں اور اس نظام کو بھی منجمد نہیں کرنا چاہتے ہیں۔ ایک سوال کے جواب میں خواجہ آصف نے کہاکہ پہلی مرتبہ ایک وزیر اعظم آئی ایم ایف کے پاس جا رہا ہے حالانکہ ماضی میں عمران خان نے خود کہا تھا کہ آئی ایم ایف کے پاس جانے سے بہتر ہے کہ خودکشی کر لوں ۔ عمران خان جو کچھ بھی 22 سال میں کہا کہ اس میں ایک پوائنٹ پر بھی عملدرآمد نہیں کیا ۔ سابق وفاقی وزیر خارجہ نے کہا کہ بیوروکریسی کو کام نہیں کرنے دیا جا رہا اور خارجہ پالیسی بھی درست سمت میں نہیں جا رہی ۔ ایک وزیر کہا رہا ہے کہ بھارتی جاسوس کلبھوش یادیو کو بھیج دیا گیا ہے

جیسا وزیر اعظم ویسے اس کے وزیر ہیں ۔ حکومت اب تک 1400 ارب روپے کے نوٹ چھاپ چکی ہے نظام کو خطرہ ہے اور ہمیں بھی تحفظات ہیں لیکن پھر بھی ہم نظام کو چلتا دیکھنا چاہتے ہیں ۔ این آر او کے سوال کے جواب میں خواجہ آصف نے کہاکہ این آر او صرف وزیر اعظم کی ہمشیرہ علیمہ خان کو دیا گیا ہے ۔ انہوں نے مزید کہا کہ موجودہ حالات کو دیکھتے ہوئے ڈر لگتا ہے کہ کہیں دیرینہ دوست ہم سے ناراض نہ ہو جائیں ۔ خواجہ آصف نے ایک اور سوال کے جواب میں کہا کہ عمران خان کے لہجے سے محسوس ہوتا ہے کہ وہ انتہائی پریشان ہیں کیونکہ چھ ماہ میں حکومت نے صرف پرانے منصوبوں پر تختیاں لگائی ہیں ۔