لاہور(این این آئی)معروف اداکار احسن خان نے کہا ہے کہ پاکستانی فلموں کی کامیابی کیلئے ٹھوس منصوبہ بندی کی ضرورت ہے ،اگر بابرہ شریف اور غلام محی الدین کی فلم ’’میرا نام ہے محبت ‘‘ چین میں 18سال تک سینما گھروں میں چل سکتی ہے تو کوئی وجہ نہیں کہ ہماری دوسری فلمیں اس طرح کے ریکارڈ نہ بنا سکیں ۔انہوں نے ’’این این آئی‘‘ سے خصوصی گفتگو کرتے ہوئے کہا کہ بالی ووڈ ہماری نسبت بڑی انڈسٹری ہے اور وہ اپنی فلم کو باقاعدہ ایک منصوبہ بندی کے تحت دنیا بھر میں ریلیز

کرتے ہیں اسی وجہ سے وہ ہزار کروڑ سے زیادہ کا بزنس حاصل کرنے میں کامیاب ہوتی ہیں ۔اگر ہم بھی مشترکہ طور پر اس طرح کی حکمت عملی اپناتے ہوئے اپنی فلموں کو عالمی مارکیٹ میں ریلیز کریں تو اس کے بڑے دو رس نتائج برآمد ہو سکتے ہیں۔ احسن خان نے کہاکہ حال ہی میں ریلیز ہونیوالے فلم ’’طیفا ان ٹربل ‘‘ نے پاکستان سمیت دیگر ممالک میں ریلیز ہو کر شاندار بزنس حاصل کیا ہے ۔انہوں نے کہا کہ میری خواہش ہے کہ ہماری ڈرامہ انڈسٹری کی طرح فلم انڈسٹری بھی فروغ پائے۔