لاہور( این این آئی) آل پاکستان انجمن تاجران کے صدر اشرف بھٹی نے کہا ہے کہ حکومت کی توجہ صرف بڑوں شعبوں پر مرکوز ہے اور پارلیمنٹ میں پیش کیا گیا ترمیمی فنانس بل اس کا منہ بولتا ثبوت ہے ، معیشت میں اہم کردار ادا کرنے والے چھوٹے تاجروں کو ریلیف دینے کیلئے کوئی اعلان نہیں کیا گیا ۔ ان خیالات کا اظہار انہوں نے اپنے دفتر میں وفاقی حکومت کے ترمیمی فنانس بل کا
جائزہ لینے کے حوالے سے منعقدہ اجلاس سے خطاب کرتے ہوئے کیا ۔ اس موقع پر دیگر عہدیداروں سمیت مختلف تجارتی مراکز کے نمائندے بھی موجود تھے ۔ اشرف بھٹی نے کہا کہ حکومت کی طرف سے یہ کہہ دینا ہے کہ اس کے اقدامات عوام دوست او ر تاجر دوست ہے کافی نہیں ۔چھوٹے تاجر یہ پوچھنے میں حق بجانب ہیں کہ ترمیمی فنانس بل میں ہماری مشکلات میں کمی کیلئے کیا اقدامات اٹھائے گئے ہیں اور ہمیں کیا ریلیف دیا گیا ہے ۔حکومت کی توجہ صرف بڑے شعبوں پر مرکوز ہے اورترمیمی فنانس بل کے نکات اس کا منہ بولتا ثبوت ہیں۔ حکومت اعدادوشمار اٹھا کر دیکھ لے ملک کی معیشت اور روزگار کی فراہمی میں تاجروں کا کتنا حصہ ہے ۔ انہوں نے کہا کہ ود ہولڈنگ ٹیکس کے حوالے سے مزید وضاحت آنی چاہیے کیونکہ اس کی وجہ سے معیشت دستاویز ات کی بجائے پرچیوں پر چلی گئی تھی جس سے حکومت کو ہی نقصان ہوا ۔ وزیر خزانہ نے تاجروں کیلئے ٹیکس ادائیگی کو آسان بنانے اور اس کا آغاز اسلام آباد سے کرنے کی بات کی گئی ہے ہمارا مطالبہ ہے کہ اس طر ح کے کسی بھی اقدام سے پہلے تمام تاجر تنظیموں کو اعتماد میں لیا جائے ۔
