جکارتہ(این این آئی)انڈونیشیا میں ڈیزاسٹر مینجمنٹ ایجنسی نے کہاہے کہ انک کراکاٹوا آتش فشاں کے پھٹنے سے آنے والے سونامی میں ہلاکتوں کی تعداد 373 ہوگئی ہے۔برطانوی ٹی وی کے مطابق ٰڈیزاسٹر میجنمنٹ ایجنسی کے ترجمان کی جانب سے جاری کردہ بیان میں کہاگیاکہ زخمیوں کی تعداد 1459 تک پہنچ چکی ہے جبکہ 128 افراد تاحال لاپتہ ہیں۔آتش فشاں کے قریب سمندر کے آس پاس بسنے والے رہائشیوں کو نئے سونامی کے خطرے کے پیش نظر ساحل سے دور رہنے کے لیے کہا گیا ہے۔بیان میں کہاکہ محکمہ
موسمیات، کلائمیٹالوجی اور جیو فیزیکل ایجنسی کی سفارشات کے تحت لوگوں کو کچھ عرصے کے لیے ساحل سے دور رہنے کے لیے کہا جا رہا ہے۔ایک چارٹر طیارے سے بنائی گئی ویڈیو میں آبنائے سنڈا میں پیش آنے والے اس واقعے کی شدت کو دیکھا جا سکتا ہے۔صدر جوکو وڈوڈو نے ہلاکتوں پر افسوس کا اظہار کیا ہے اور لوگوں سے صبر کی تلقین کی ہے۔دوسری جانب سڑکوں کی بندش کے باعث امدادی کارروائیاں شدید متاثر ہو رہی ہیں تاہم ملبہ ہٹانے کے لیے بھاری مشینری متاثرہ علاقوں تک پہنچا دی گئی ہے۔
