اسلام آباد (این این آئی)وزیر مملکت برائے داخلہ شہریار آفریدی نے کہا ہے کہ وزیراعظم عمران خان نے طاہر داوڑ شہید کیاہلخانہ کیلئے مجموعی طور پر سات کروڑ روپے کے پیکیج کا اعلان کیا ہے ٗبیٹے کو پولیس میں اسسٹنٹ سب انسپکٹر کی نوکری بھی دی جائیگی ٗطاہر داوڑ کیس کے معاملے پر پارلیمانی کمیٹی بنائی جائے گی جو حکومت اور اپوزیشن کے نمائندوں پر مشتمل ہوگی

ٗکمیٹی جے آئی ٹی کے ساتھ ملکر کام کر ے گی ٗمولانا سمیع قتل کیس کی 99فیصد انکوائری مکمل ہو چکی ہے ٗ جب تک تمام معاملہ کلیئر نہ ہو کچھ بات نہیں کرنی چاہیے ٗپاکستان ایک جمہوری ملک ہے ٗ سیاست کرنے کا سب کو حق ہے، بعض عناصر اپنے مذموم مقاصد کیلئے انتشار پھیلارہے ہیں، سوشل میڈیا پر حکومت کے خلاف منفی پروپیگنڈا کیا جارہا ہے۔ منگل کو یہاں میڈیا سے بات چیت کرتے ہوئے شہریار آفریدی نے بتایا کہ طاہر داوڑ کے بیٹے کو پولیس میں اسسٹنٹ سب انسپکٹر (اے ایس آئی) کی نوکری بھی دی جائے گی۔وزیر مملکت نے کہا کہ شہید ایس پی طاہر داوڑ نڈر جوان افسر تھے، ان کی فیملی پر بھی قاتلانہ حملے ہوئے، طاہر داوڑ کے قتل کے واقعہ پر وزیراعظم نے فوری نوٹس لیا اور جے آئی ٹی قائم کی۔شہریار آفریدی نے کہا کہ طاہر داوڑ کیس کے معاملے پر پارلیمانی کمیٹی بنائی جائے گی جو حکومت اور اپوزیشن کے نمائندوں پر مشتمل ہوگی، کمیٹی جے آئی ٹی کے ساتھ مل کر کام کرے گی۔وزیر مملکت نے کہا کہ وزیراعظم نے مولانا سمیع الحق کے قتل کی بھی تحقیقات کا حکم دیا ہے، جب تک تمام معاملہ کلیئر نہ ہو کچھ بات نہیں کرنی چاہیے، 99 فیصد انکوائری مکمل ہوچکی ہے، انکوائری پر فرق نہ پڑے اس لیے کچھ سامنے نہیں لاسکتے۔شہر یار آفریدی نے کہاکہ پاکستان ایک جمہوری ملک ہے اور سیاست کرنے کا سب کو حق ہے، بعض عناصر اپنے مذموم مقاصد کیلئے انتشار پھیلارہے ہیں، سوشل میڈیا پر حکومت کے خلاف منفی پروپیگنڈا کیا جارہا ہے۔وزیر مملکت برائے داخلہ شہریار آفریدی کے مطابق کراچی میں تجاوزات کے خلاف آپریشن سے وفاقی حکومت کا کوئی تعلق نہیں تاہم آپریشن میں غریبوں کو تنگ نہیں کیا جائے گا۔