اسلام آباد(مانیٹرنگ ڈیسک)وفاقی وزیر خزانہ اسد عمر اور کپتان کے مشیر تجارت و صنعت و پیداوار عبدالرزاق دائود کے درمیان جھگڑے کی خبریں، ترجمان وزارت خزانہ نے تردید کر دی، وزیر خزانہ استعفیٰ نہیں دے رہے، خبریں سازش کے تحت پھیلائی گئیں، وضاحت جاری۔ تفصیلات کے مطابق وفاقی وزیر خزانہ اسد عمر اور کپتان کے مشیر تجارت و صنعت و پیداوار عبدالرزاق دائود کے درمیان جھگڑے کی خبروں پر وزارت خزانہ کی جانب سے بیان جاری کیا گیا ہے
جس میں اس طرح کی تمام خبروں کی تردید کی گئی ہے۔ ترجمان وزارت خزانہ کے جاری بیان میں کہا گیا ہے کہ بحث پارٹی کلچر کا حصہ ہوتی ہے اور مثبت بحث تعمیری اثرات مرتب کرتی ہے۔ ترجمان وزارت خزانہ کا کہنا تھا کہ اس طرح کی خبریں مذموم سازش کے تحت پھیلائی گئی ہیں جن کا حقیقت سے کوئی تعلق نہیں۔ وزیر خزانہ اسد عمر نے نہ تو استعفیٰ دینے کی بات کی اور نہ ہی استعفیٰ دے رہے ہیں۔ ان کے استعفے کے حوالے سے سازشی عناصر مذموم پروپیگنڈہ کر رہے ہیں۔
