ریاض(این این آئی )سعودی عرب کی وزارت حج اور عمرہ نے بتایا ہے کہ ہجری سال کے آغاز کے بعد سے عمرہ کی ادائیگی کے لیے حجازِ مقدس میں پہنچے والے عازمین کی تعداد 1318605 ہوچکی ہے۔غیرملکی خبررساں ادارے کے مطابق ان سرکاری اعداد وشمارمیں بتایاگیا۔

سعودی عرب میں عمرہ ادا کرنے کے لیے اب تک دس لاکھ سے زیادہ عازمین داخل ہوئے ہیں۔اس سے پہلے مملکت میں موجود عازمین کی تعداد 362225 تھی ،ان میں سے مکہ میں موجود عازمین کی تعداد 242638 تھی۔قبل ازیں 677000 زائرین عمرہ ادا کرنے کے بعد سعودی عرب سے واپس اپنے آبائی ممالک میں جاچکے ہیں۔سرکاری اعداد وشمار کے مطابق 7941 سعودی ملازمین کمپنیوں اور اداروں میں عمرہ کی خدمات کے سلسلے میں کام کررہے ہیں اور ان میں خواتین کی تعداد 1239 ہے۔سعودی عرب کی وزارتِ حج وعمرہ نے رواں ہجری سال کے آغاز پر ہفتہ وار عمرہ کوائف نامے ( انڈیکس) کا اجرا کیا تھا۔اس کے تحت عمرے کے لیے جاری کردہ ویزوں کی تعداد ، سعودی عرب میں برّی، فضائی اور بحری راستے سے داخل ہونے والے عازمین کی تعداد، ان میں سے مکہ مکرمہ اور مدینہ منورہ میں موجود زائرین اور عمرے کی ادائی کے بعد لوٹ جانے والے زائرین کی تعداد کے بارے میں تفصیل جاری کی جاتی ہے۔رواں عمرہ سیزن کے دوران میں اب تک پاکستان سے سب سے زیادہ تعداد میں زائرین عمرے کی ادائیگی کے لیے سعودی عرب گئے ۔ گذشتہ تین ماہ کے دوران میں ان کی تعداد 359000 تک پہنچ چکی ہے۔اس کے بعد انڈونیشیا 204176 زائرین کے ساتھ دوسرے نمبر پر ہے۔بھارت تیسرے نمبر پر ہے اور وہاں سے عمرے کے لیے سعودی عرب جانے والے زائرین کی تعداد 178893 ہوچکی ہے۔کوائف نامے کے اجرا کا مقصد زائرین اور عازمین عمرہ کو مہیا کی جانے والی خدمات کے معیار کو بہتر بنانا ہے۔اس کو سعودی عرب کے ویڑن 2030ء کی روشنی میں وضع کیا گیا ہے۔اس ویڑن کے تحت سالانہ عازمین عمرہ کی تعداد تین کروڑ تک پہنچائی جائے گی اور انھیں اعلیٰ معیار کی خدمات مہیا کی جائیں گی۔