اسلام آباد(آن لائن)وفاقی دارالحکومت سے مبینہ طور پر لاپتہ ہونے والے سی ڈی اے کے ڈپٹی ڈائریکٹر دو بیویوں کے ستائے انتہائی مظلوم شوہر نکلے ہیں ۔گزشتہ روز دوسری بیوی کے ہمراہ دفعہ164 کا بیان ریکارڈ کراتے ہوئے گھر سے ناراضگی کا ملبہ پہلی بیوی پر ڈال دیا ۔سوتیلی بیٹی کا رشتہ مرضی سے نہ ہونے پر شہر سے دور چلا گیا ۔معلوم ہوا ہے کہ سی ڈی اے کے ڈپٹی ڈائریکٹر ایاز خان نے دفعہ 164کا بیان ریکارڈ کراتے ہوئے بتایا کہ ان کی سوتیلی بیٹی کا رشتہ ان کی مرضی کے خلاف ہوا

تھا جس کے باعث وہ اپنی پہلی بیوی سے ناراض ہو کر دوسری بیوی کے ہمراہ ڈیرہ اسماعیل خان چلے گئے تھے اور اس دوران انہوں نے جان بوجھ کر کسی کو اطلاع نہیں دی ۔پولیس ذرائع کا کہنا ہے کہ ایاز خان کے مبینہ طور پر لاپتہ ہونے اور 164کے بیان کے بعد ان کیخلاف کارروائی نہیں کی جاسکتی ہے اور ایاز خان سے اشٹام کے ذریعے معافی نامہ لکھوانے کے بعد رہا کیا جائے گا اور اسی پر ان کے اغواء سے متعلق درج ہونیوالے مقدمہ کو خارج کرنے کی بھی سفارش کی جائے گی ۔