کابل(نیوزڈیسک)افغان دارالحکومت کے ہوائی اڈے کے قریب خود کش حملے میں 2 خواتین سمیت 3 افراد ہلاک اور18 زخمی ہوگئے زخمیوں میں بعض کی حالت نازک ہے جس کے باعث ہلاکتوں میں اضافے کا خدشہ ہے ۔غیر ملکی میڈیا کے مطابق افغانستان کے دارالحکومت کابل کے بین الاقوامی ہوائی اڈے کے باہر ایوی ایشن کے دفاتر کے قریب واقع چیک پوسٹ پر کار میں موجود خودکش حملہ آاور نے خود کو اڑالیا۔ دھماکے کے نتیجے میں 2 خواتین اور ایک بچہ موقع پر ہی ہلاک جب کہ 18 زخمی ہوگئے، جن میں 8 خواتین اور 3 بچے بھی شامل ہیں۔کابل پولیس کے ترجمان عباد اللہ کے مطابق خودکش حملے کا ہدف نیٹو فوجی تھے لیکن ایسا نہ ہوسکا اور حادثے میں عام شہری ہلاک اور زخمی ہوئے۔ دھماکےکی ذمہ داری کسی نے قبول نہیں کی۔وزارت داخلہ کے ترجمان نجیب دانش نے بتایا کہ دھماکے میں ایک غیر ملکی فوجی گاڑی تباہ ہوئی .دو عام گاڑیوں کو نقصان پہنچا۔دھماکہ ائر پورٹ کے مرکزی دروازے سے صرف 200 میٹر کے فاصلے پر ہوا . اس سے تھوڑا دور ہی نیٹو افواج کا بیس بھی واقع ہے۔یورپی یونین پولیس کی ترجمان سری ہواکا کونو کے مطابق خود کش حملے میں یورپی یونین کے ٹریننگ مشن کے ارکان کو نشانہ بنایا گیا جس میں سے ایک رکن ہلاک ہوا . دیگر ارکان معمولی زخمی ہوئے ہیں