اسلام آباد(نیوز ڈیسک)صوبائی دارلحکومت پشاور میں تیس مئی کو ہونے والے بلدیاتی انتخابات کے لئے سکیورٹی پلان تشکیل دے دیا گیا ہے۔ چھ سو تیس پولنگ اسٹیشنز حساس قرار دے دیئے گئے ہیں۔انتخابات کے پرامن انعقاد کو یقینی بنانے کے لئے شہر میں سات ہزار پولیس اہلکار بھی تعینات کئے گئے ہیں۔خیبر پختونخوا میں تیس مئی کو ہونے والے بلدیاتی انتخابات کےلئے الیکشن کمیشن تیاریوں کو حتمی شکل دے رہا ہے۔ تاہم صوبائی دارلحکومت پشاور اور مضافاتی علاقوں میں الیکشن کے پرامن انعقاد کو یقینی بنانے کے لئے جامع سکیورٹی پلان تیار کر لیا گیا ہے۔ انتخابات کے موقع پر سات ہزار پولیس اہلکاروں کے ساتھ ساتھ ریزرو فورس کے جوان بھی فرائض سرانجام دینگے۔سی سی پی او اعجاز احمد کا کہنا ہے کہ شہر کے مضافاتی علاقوں میں پولیس کے خصوصی دستے تعینات رہیں گے۔ انتخابات کے دوران 630پولنگ اسٹیشنز حساس قرار دے دیئے گئے ہیں جہاں ساد ہ لباس میں اہلکاروں سمیت بم ڈسپوزل اسکواڈ اور لیڈی پولیس بھی تعینات ہوں گے ۔