کراچی (مانیٹرنگ  ڈیسک) موسم سرما قریب آتے ہی ملک میں گیس کی طلب بڑھ جانے سے سندھ میں سی این جی اسٹیشنز مزید ایک دن بند رہیں گے، سی این جی کی فراہمی اڑتالیس گھنٹے تک بند رہے گی۔ تفصیلات کے مطابق ترجمان سوئی سدرن گیس نے کہا کہ سندھ میں سی این جی

بندش میں ایک دن کااضافہ کردیاگیا، صوبے میں سی این جی کی فراہمی اڑتالیس گھنٹے تک بند رہےگی۔ ترجمان کا کہنا تھا کہ سی این جی اسٹیشنز جمعہ کی صبح آٹھ بجے کھلیں گے اور ہفتہ کی صبح آٹھ بجے سے چوبیس گھنٹے کیلئے سندھ میں سی این جی کی فراہمی بند رہے گی جبکہ میرپور میں کنڈا والی گیس فیلڈ کی سالانہ بندش سے فراہمی معطل رہے گی ۔ ایس ایس جی سی کے سسٹم میں چار سوایم ایم سی ایف گیس سپلائی کی کمی ہوئی ہے جبکہ کوئٹہ میں سردی بڑھنے پر گھریلو صارفین کی گیس طلب میں اضافہ ہوا ہے۔ یاد رہے گذشتہ ماہ حکومت کی جانب سے سی این جی صارفین کے لیے بھی گیس 40 فیصد مہنگی کی گئی تھی ، کے پی، بلوچستان میں سی این جی 20 روپے فی کلو جبکہ کمرشل اور تندور کنکشن پر گیس 40 فیصد تک مہنگی دی جائے گی۔ گیس کی قیمتوں میں اضافے پر سی این جی ایسوسی ایشن کا ردعمل سامنے آیا تھا، غیاث پراچہ نے کہا تھا کہ سی این جی کے لیے گیس کی قیمت بڑھا کر غریب عوام سے زیادتی کی گئی ہے، حکومت فیصلے پر نظرثانی کرکے سی این جی کی قیمتوں میں کمی کرے۔ ان کا کہنا تھا کہ حکومت نے عوام کو ریلیف کے لیے پیٹرول کی قیمتیں نہیں بڑھائیں، اضافہ سمجھ سے بالاتر ہے، سی این جی بھی تو عوام استعمال کرتے ہیں، نئے نرخ سے سی این جی میں تقریباً 15 روپے کا اضافہ متوقع ہے، اضافہ 27 ستمبر سے کیا گیا، یہ پیسے عوام سے کیسے وصول کیے جائیں گے۔