اسلام آباد (آن لائن) حکومت نے پاور سیکٹر کے گردشی قرضہ میں کمی کیلئے پلان تیار کرلیا ہے گردشی قرضہ کو رواں سال میں 300 ارب روپے تک کم کیا جائے گا اسی حوالے سے حکومت نے ایک ٹاسک فورس بھی قائم کردی ہے۔ ہر صوبے اور وفاق کی علیحدہ علیہدہ فورسز ہوں گی جو بجلی چوری اور لائن لاسز میں کمی کے
حوالے سے اپنی باقاعدہ رپورٹ پیش کریں گے۔ ذرائع کے مطابق بجلی تقسیم کار کمپنیوں کو بھی اس حوالے سے باقاعدہ طو رپر آگاہ کردیا گیا ہے اور ایسے فیڈرز جہاں چوری اور لائن لاسز کی شرح زیادہ ہے ایسے فیڈرز کو بند کرنے اور صارفین کی بجلی منقطع کرنے کا ٹاسک دے دیا ہے ۔ ذرائع کا کہنا ہے کہ بجلی چوری کے خلاف سخت اقدامات کئے جائیں گے۔ اور صوبوں کو خصوصی طور پر ٹاسک دیئے جائین گے تاکہ چوری کو کم کیا جاسکے۔ ذرائع کا کہنا ہے کہ ایسی ڈسکوز جن کے لائن لاسز اور چوری سب سے زیادہ ہے ان کو ایک وقت دیا جائے گاکہ وہ اپنی کارکردگی بہتر بنالیں اس کے علاوہ ان علاقوں کے ممبر قومی و صوبائی اسمبلی لوکل حکومتوں سے بھی مدد حاصل کی جائے گی تاکہ بجلی چوری پر قابو پایا جاسکے۔ واضح رہے کہ وزارت توانائی پاور ڈویژن نے وزیراعظم پاکستان عمران خان کو ایک رپورٹ بھی پیش کی ہے جس میں بجلی کے گردشی قرضہ میں کمی اور پاور سیکٹر میں بہتری کے حوالے سے اقدامات کرنے کی تجاویز دی گئی ہیں۔
