اسلام آباد (این این آئی)وفاقی وزیر پاور ڈویژن عمر ایوب خان نے کہا ہے کہ بجلی کی ترسیل اور تقسیم کے نظام کیلئے 5 ارب ڈالر سے زائد کی سرمایہ کاری درکار ہو گی ٗپاکستان میں ترقی کی بڑی صلاحیت موجود ہے ٗانرجی مارکیٹ آنے والے برسوں میں مزید وسعت اختیار کرے گی۔ وہ یہاں چین کے قومی ترقی اور اصلاحات کمیشن کے وائس چیئرمین لیان وی لیانگ سے گفتگو کررہے تھے ۔

عمر ایوب خان نے بیلٹ اینڈ روڈ انرجی وزارتی کانفرنس میں مدعو کرنے پر ان کا شکریہ ادا کیا اور امید ظاہر کی کہ چین کی مثالی قیادت میں یہ کانفرنس علاقائی توانائی کی صورتحال کو بہتر بنانے میں اہم کردار ادا کرے گی۔ انہوں نے لیان وی لیانگ کو پاکستان تحریک انصاف کی حکومت کی توانائی کی ترجیحات سے آگاہ کیا اور کہا کہ پاکستان میں بجلی کی تقسیم کے نظام میں 5 ارب ڈالر سے زائد کی سرمایہ کاری درکار ہے جبکہ بجلی کی ترسیل کے نظام کو بہتر بنانے کیلئے بڑے پیمانے پر سرمایہ کاری کی ضرورت ہو گی۔ عمر ایوب خان نے لیان وی لیانگ کو پاکستان کے دورہ کی دعوت بھی دی۔ لیان وی لیانگ نے امید ظاہر کی کہ پاکستان اور چین کے درمیان توانائی کے شعبہ میں تعلقات مزید مستحکم ہوں گے۔ انہوں نے کہا کہ پاکستان میں ترقی کی بڑی صلاحیت موجود ہے اور اس کی انرجی مارکیٹ آنے والے برسوں میں مزید وسعت اختیار کرے گی۔ انہوں نے کہا کہ چین توانائی کے شعبہ میں اصلاحات اور اسے وسعت دینے کیلئے پاکستان کی کوششوں میں تعاون جاری رکھے گا۔ انہوں نے دونوں ممالک کے درمیان تعلقات کو مضبوط بنانے کی اہمیت کا ذکر کرتے ہوئے کہا کہ پاکستان اور چین توانائی کے مختلف منصوبوں پر پیشرفت کا باقاعدگی کے ساتھ جائزہ لے سکتے ہیں اور انہیں تیز رفتاری کے ساتھ اور بروقت مکمل کرنے کیلئے مشترکہ ترجیحات اور منصوبے تیار کر سکتے ہیں۔ انہوں نے کہا کہ چین کی قیادت خود کفالت کے حصول کیلئے پاکستان میں توانائی کے شعبہ میں مزید سرمایہ کاری کیئے پرعزم ہے۔